ދިވެހިރާއްޖޭގެ ތާރީޚުގައި ވެސް ފަޤީރުންގެ ދަފުތަރުގައި ޖެހިފައިވާ ފަރާތްތަކަށް އެންމެ ބޮޑު ހޭދައެއް ކުރެވުނީ ވޭތުވެދިޔަ ދެ އަހަރު ދުވަހުގެ ތެރޭގައި ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު މިކަން ހާމަކުރެއްވީ، މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް ފައިސާގެ ޢަދަދު، ވޭތުވެދިޔަ އަހަރު މުޅިއެކު ލިބުނު ޖުމުލަ ޢަދަދަށް ވުރެ އިތުރުވެފައިވާތީ އެކަމަށް އިޝާރާތްކުރަށްވައި ސޯޝަލްމީޑިއާގައި ކުރެއްވި ޕޯސްޓެއްގައެވެ.

Ad by Hajj Corporation

ވަޒީރު ފާހަގަކުރެއްވި ގޮތުގައި މިއަހަރަކީ ރާއްޖޭގެ މުޅި ތާރީޚުގައި ވެސް އެންމެ ގިނައިން މީހުން ޒަކާތް ދެއްކި އަހަރެވެ. އަދި މިދިޔަ ދެ އަހަރަކީ ތާރީޚީ ގޮތުން ވެސް އެންމެ ގިނައިން ޒަކާތް ލިބުނު އަދި އެ ނިޒާމަށް ވަރަށް ހެޔޮ ބަދަލުތަކެއް ގެނެވުނު ދެ އަހަރެވެ.

ޑރ. ޝަހީމް ވިދާޅުވީ، ފަޤީރުންނަށް މާލީ އެހީތެރިކަން ދިނުމުގެ އިތުރުން ފަޤީރުންގެ ތަޢުލީމާއި ޞިއްޙަތަށް ވެސް މި މުއްދަތުގައި ވަނީ ހޭދަކުރެވިފައެވެ. އަދި ޝަރީޢާ ހުއްދަކުރާ މަގުން ޒަކާތު ފަންޑު އިތުރުކުރުމަށް ގިނަ މަސައްކަތްތަކެއް ފެށި، ޒަކާތަށް ޚާއްޞަ ވަކި އިދާރާއެއް ޤާއިމުކުރެވިފައިވާ ކަމަށް ވެސް ވަޒީރު ފާހަގަކުރެއްވިއެވެ.

ރާއްޖޭގެ ޒަކާތުގެ ނިޒާމާ ގުޅޭގޮތުން އިތުރަށް ވާހަކަދައްކަވަމުން ވަޒީރު ވިދާޅުވީ، ރާއްޖޭގެ ޒަކާތުގެ ނިޒާމަކީ ޤާނޫނަކުން ރައްކާތެރިކަން ލިބިފައިވާ އަދި ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ ނިޒާމެއް ކަމަށެވެ. އެގޮތުން ޒަކާތު ފައިސާ ބަލަހައްޓަމުން ދަނީ މަރުކަޒީ ބޭންކުން ކަމަށާއި، ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން ޢާއްމުކޮށްފައިވާ ޝަރީޢާ ގައިޑްލައިނާ އެއްގޮތަށް، ޒަކާތު ކައުންސިލާއި ޝަރީޢާ ކޮމިޓީގެ ލަފާގެ މަތިން ކަމަށް ވިދާޅުވިއެވެ. މީގެއިތުރުން، ޒަކާތުގެ ފައިސާ ޚަރަދުކުރެވެމުންދާ ގޮތް މަހުން މަހަށް ޢާއްމުކޮށް ހާމަކުރަމުންދާ ކަމަށް ވެސް ވިދާޅުވިއެވެ.

ވަޒީރު ވަނީ ދިވެހި ރައްޔިތުން ރާއްޖޭގެ ޒަކާތުގެ ނިޒާމަށް ދެއްވަމުން ގެންދަވާ އިތުބާރަށްޓަކައި ޝުކުރު އަދާކުރައްވާފައެވެ. އަދި ޤާނޫނަކުން ޒަކާތުގެ ނިޒާމު ތަރައްޤީކޮށްދެއްވި ކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވެސް ވަޒީރު ވަނީ ޝުކުރު ދަންނަވާފައެވެ.