ރާއްޖޭގެ ހުރިހާ ރިހެބިލިޓޭޝަން ސެންޓަރުތަކުން 1200 އަށްވުރެ ގިނަ މީހުންނަށް މިހާރުވެސް ފަރުވާދެމުން އަންނަކަމަށް ނޭޝަނަލް ޑްރަގް އެޖެންސީ (އެންޑީއޭ) އިން ހާމަކޮށްފިއެވެ.ެ

ދާޚިލީ ސަލާމަތާއި ފަންނިއްޔާތާބެހޭ ވުޒާރާގެ ސްޓޭޓް މިނިސްޓަރ، ލުބްނާ މުޙައްމަދު ޒާހިރު ދައުލަތުގެ މީޑިއާއަށް މައުލޫމާތުދެމުން ވިދާޅުވި ގޮތުގައި، މުޅި ރާއްޖޭގެ އެކި ކަންކޮޅުތަކުގައި ހުރި 12 ރިހެބިލިޓޭޝަން ސެންޓަރުގައި ފަރުވާ ހޯދަމުންދަނީ އަމިއްލައަށް ފަރުވާއަށް އެދިގެން އަންނަ ފަރާތްތަކާއި ކޯޓުން ޙުކުމްކޮށްގެން ގެންނަ ފަރާތްތަކެވެ.

Ad by Hajj Corporation

ލުބްނާ ވިދާޅުވިގޮތުގައި ނޭޝަނަލް ޑްރަގް އެޖެންސީގެ ފަރުވާދޭ ސެންޓަރުތައް ދަނީ ފުލްކޮށެވެ. އަދި ޚާއްސަކޮށް ހިންމަފުށީގެ ރީހެބް ފުލްކަން އޭނާ ފަހަގަކުރެއްވިއެވެ.

ރިހެބިލިޓޭޝަން ސެންޓަރުތަކުގެ ޖާގައިގެ ދަތިކަން ހައްލުކުރުމަށް، ހުޅުމާލޭގައި މަސްތުވާތަކެއްޗާއި ނަފްސާނީ ބަލިތަކަށް ފަރުވާދޭ އައު މަރުކަޒެއް ޤާއިމްކުރުމުގެ މަސައްކަތް މިހާރު ކުރިއަށްދާކަމަށް ލުބްނާ ހާމަކުރެއްވިއެވެ.

މިދިޔަ އަހަރު ޑްރަގް ކޯޓުން 597 ކްލައިންޓުންނަށް ޙުކުމްކޮށްފައިވާއިރު، މިއަހަރުގެ މިހާތަނަށް 500 އަށްވުރެ ގިނަ ކްލައިންޓުންނަށް ހުކުމްކޮށްފައިވާކަމަށް ލުބްނާ ފާހަގަކުރެއްވިއެވެ. އަދި ރިމާންޑް ސެންޓަރަށް ގެނެވޭ ގިނަ ފަރާތްތަކަކީ ނަފްސާނީ އަދި ސިއްހީ ފަރުވާ ބޭނުންވާ ފަރާތްތައްކަން ފާހަގަކުރެއްވިއެވެ.

ރިހެބިލިޓޭޝަން ސެންޓަރުތަކަކީ މަސްތުވާތަކެތީގެ ވަބާގައި ޖެހިފައިވާ ފަރާތްތަކަށް އިސްލާޙީ ފަރުވާ ދިނުމާއި، މަސްތުވާތަކެތީގެ ކިބައިން ސަލާމަތްވުމަށް އެހީތެރިވެދިނުމަށް ޚާއްޞަކޮށްގެން ހިންގާ މަރުކަޒުތަކެކެވެ.