ޣައްޒާއަށް އިންސާނީ އެހީ ފޯރުކޮށްދިނުމަށް ދަތުރުކުރަމުންދިޔަ ގްލޯބަލް ސުމޫދު ފްލޮޓިލާގެ 13 އުޅަނދެއް އިސްރާއީލު ސިފައިން ވަނީ ހުއްޓުވާލައި، އެ އުޅަނދުތަކުގައި ތިބި އެކްޓިވިސްޓުން ހައްޔަރުކޮށްފައެވެ.

ގްލޯބަލް ސުމޫދު ފްލޮޓިލާގެ ޚަބަރު ފަތުރާ ފަރާތްކަމުގައިވާ ސައިފް އަބޫކެޝެކް ހާމަކުރި ގޮތުގައި، ހުއްޓުވާލެވުނު އުޅަނދުތަކުގައި 37 ޤައުމެއްގެ 201 އަށްވުރެ ގިނަ އެކްޓިވިސްޓުން ދަތުރުކުރަމުން ދިޔައެވެ. މީގެ ތެރޭގައި ސްޕެއިންގެ 30 ބައިވެރިންނާއި، އިޓަލީގެ 22 މީހުންނާއި، ތުރުކީގެ 21 މީހުންނާއި އަދި މެލޭޝިއާގެ 12 މީހުން ހިމެނެއެވެ.

Ad by Hajj Corporation

އަބޫކެޝެކް އިތުރަށް ހާމަކުރި ގޮތުގައި، "އަޅުގަނޑުމެންގެ ގާތްގަނޑަކަށް 30 އުޅަނދު އަދިވެސް އޮކިއުޕޭޝަން ފޯސްގެ ހަނގުރާމަވެރި އުޅަނދުތަކުން ދުރަށް ދެވޭތޯ މަސައްކަތްކުރަމުން ދަނީ ޣައްޒާގެ އައްސޭރިއަށް ވާސިލުވުމަށް" ކަމަށާއި، އެކްޓިވިސްޓުން ދަނީ ވަރަށް ބޮޑު ޢަޒުމަކާއެކު މަސައްކަތް ކުރަމުންނެވެ.

އިސްރާއީލުން މި އުޅަނދުތައް ހުއްޓުވާލި ނަމަވެސް، ގްރޫޕްގެ "މިޝަން" އަދިވެސް ކުރިއަށްދާ ކަމަށާއި، މެޑިޓަރޭނިއަން މެދުވެރިކޮށް ޣައްޒާގެ ބްލޮކޭޑް ނައްތާލުމަށް އުޅަނދުތައް ދަތުރުކުރަމުންދާ ކަމަށް އަބޫކެޝެކް ވަނީ ފާހަގަކޮށްފައެވެ.

މި ހާދިސާއިން ދައްކުވައިދެނީ ފަލަސްތީނުގެ ރައްޔިތުންނަށް އެހީތެރިވުމަށް އެކްޓިވިސްޓުންގެ ހިތްވަރާއި ހިތްމަތިވެރިކަމަށް އެއްވެސް ބަދަލެއް އައިސްފައި ނުވާކަމެވެ. އަދި އިސްރާއީލުގެ ހުރަސްތަކާ ކުރިމަތިލާންޖެހުނު ނަމަވެސް، ޣައްޒާގެ ރައްޔިތުންނަށް އެހީވުމުގެ މަސައްކަތް ހުއްޓާލާފައި ނުވާކަން ފާހަގަކުރެވެއެވެ.