ހަމާސް އާއި އިސްރާއީލުން ހަނގުރާމަ ހުއްޓާލުމާއި ރަހީނުން ދޫކޮށްލުމަށް އެއްބަސްވެއްޖެއެވެ.

މިކަން އިއުލާންކުރަމުން އެމެރިކާގެ ރައީސް ޑޮަނަލްޑް ޓްމްޕް ވިދާޅުވެފައިވަނީ، އެއްބަސްވުމުގެ ފުރަތަމަ މަރުހަލާ އަށް އެއްބަސްވެވިފައިވާކަމަަށެވެ. އަދި އެ ، މަރުހަލާ ނިމުމަށްފަހު ގާޒާ އަލުން ބިނާކުރެވޭނެ ކަމަށް ބުނެފަވެއެވެ.

Ad by Hajj Corporation

އިސްރާއީލްގެ ބޮޑުވަޒީރު ނަތަންޔާހޫ ވެސް ވަނީ މި އެއްބަސްވުން މިއަދު ކެބިނެޓުން އެޕްރޫވްކުރާނެކަމަށް ބުނެފައެވެ.

މި އެއްބަސްވުމަށް ވާސިލުވުމުގައި ހަމާސްގެ މައި މުއާމަލާތްކުރާ ފަރާތް ކަމުގައިވާ، އިސްރާއީލްގެ ވައިގެ ހަމަލާއަކުން ސަލާމަތްވެވަޑައިގެންފައިވާ ލީޑަރ ހަލީލް އަލް-ހައްޔާގެ ދައުރު ފާހަގަކޮށްލެވެއެވެ.

ހަލީލް އަލް-ހައްޔާ ވަނީ ސެޕްޓެމްބަރު 9 ގައި ޤަތަރުގައި އިސްރާއީލްގެ އެއަރ ސްޓްރައިކަކުން ސަލާމަތްވިތާ މަހެއްގެ ފަހުން މިސްރުގެ މަޝްވަރާތަކުގައި ބައިވެރިވެފައެވެ. އިސްރާއީލީ ހަމަލާތަކުގައި ހަމާސްގެ ކުރީގެ ލީޑަރުންކަމަށްވާ އިސްމާއީލް ހަނިއްޔާ އީރާނަށް ކުރި ދަތުރެއްގައި ޝަހީދުކޮށްލާފައިވުމާއި، އަދި އަނެއް ލީޑަރު ޔަހްޔާ ސިންވަރު ގާޒާގައި ޝަހީދުކޮށްލުމާއެކު ހަލީލް އަލް-ހައްޔާ އަކީ ހަމާސް މިލިޓަންޓް ގްރޫޕްގައި އިތުރަށް ނުފޫޒު ފޯރުވާ އިސްލީޑަރެއްކަމުގައި ވަނީ ވެފައެވެ.

1960 ގައި ޣައްޒާގައި އުފަން ހައްޔާ ވަނީ 1987 ގައި ހަމާސް އުފެދުނީއްސުރެ އެ ޖަމާއަތުގައި ހިމެނިފައެވެ. މިހާރުގެ ޣައްޒާގެ ހަނގުރާމައިގައި އަދި ކުރީގެ ހަނގުރާމަތަކުގައި ދެ ދަރިއަކު ގެއްލިފައިވާ ހައްޔާ، އެހެން ހަމާސްގެ ލީޑަރުންނާއެކު ދޯހާގައި އޭނަ ވަނީ މަޑުކޮށްފައެވެ.

ހަމާސްއަށް މުހިންމު ހަތިޔާރާއި ފައިސާގެ އެހީ ފޯރުކޮށްދޭ އީރާނާއެކު ރަނގަޅު ގުޅުމެއް އޮތް ކަމަށް ބެލެވޭ ހައްޔާ ވަނީ އިސްރާއީލާއެކު އެކި ފަހަރު މަތިން ހަނގުރާމަ ހުއްޓާލުމުގެ މަސައްކަތުގައި ގާތުން ބައިވެރިވެފައެވެ.

އޮކްޓޯބަރު 7 ގައި ހިންގުނު ހަމަލާތަކާ ގުޅޭގޮތުން ހައްޔާ ވަނީ އެއީ "މަދު އަދަދެއްގެ ސިފައިން" ހިފުމަށް ހަމާސްއިން ދިން މަހްދޫދު އޮޕަރޭޝަނެއް ކަމަށް ބުނެފައެވެ. މި ހަމަލާތަކުގައި އިސްރާއީލުން ބުނާ ގޮތުން 1,200 މީހުން މަރުވިއެވެ. މި ހަމަލާތަކުގެ މަޤްސަދަކީ އިސްރާއީލުން ހައްޔަރުކޮށްފައިވާ ފަލަސްތީނުންނާ ބަދަލުކުރުން ކަމަށް އޭނާ ބުނެފައިވެއެވެ.