ވިކްޓްރީ ސްޕޯޓްސް ކުލަބުގެ ހެޑް ކޯޗުގެ މަގާމަށް ސްލޮވާކިޔާގެ ތަޖުރިބާކާރު ކޯޗު ޖޯޖްލީ ގެރީ ހަމަޖައްސައިފިއެވެ. އައު ކޯޗު ތައާރަފުކުރުމަށް އަދި އެ ކުލަބުގެ އައު ބޯޑު މީޑިއާއަށް ތައާރަފުކުރުމަށް ރޭ ހާއްސަ ރަސްމިއްޔާތެއް ބާއްވާފައިވެއެވެ.

48 އަހަރުގެ ޖޯޖްލީއަކީ ޔުއެފާ ޕްރޯ ލައިސަންސް އޮންނަ ކޯޗެކެވެ. އޭނާއަކީ ކުރީގެ މަޝްހޫރު ޑިފެންޑަރެއް ކަމަށްވާއިރު، 2014 ވަނަ އަހަރުން ފެށިގެން ކޯޗިންގ ދާއިރާގައި މަސައްކަތްކުރަމުން އަންނަ ފަރާތެކެވެ. ސްލޮވާކިޔާގެ ފުރަތަމަ ޑިވިޝަންގައި މަސައްކަތްކޮށްފައިވާ ޖޯޖްލީ، އެ ގައުމުގެ ޔޫތް ޑިވެލޮޕްމަންޓް ޑިރެކްޓަރުގެ މަގާމުވެސް އަދާކޮށްފައިވެއެވެ.

Ad by Hajj Corporation

ޔޫރަޕްގެ ފުޓްބޯޅައިގެ އުކުޅުތައް ދަސްކޮށްފައިވާ ޖޯޖްލީ އާއެކު އެންމެ ފުރަތަމަ ވިކްޓްރީ ސްޕޯޓްސް ކުލަބުން ނިކުންނާނީ ދިރާގު ދިވެހި ޕްރިމިއާ ލީގުގައި މިރޭ އޮޑި ސްޕޯޓްސް ކުލަބާ ދެކޮޅަށެވެ. މިވަގުތު ވިކްޓްރީ އޮތީ 3 ޕޮއިންޓާއެކު ލީގު ތާވަލުގެ 5 ވަނައިގައެވެ.

ވިކްޓްރީން މިހާތަނަށް ކުޅުނު މެޗުތަކުގެ ތެރެއިން 1-0 ގެ ނަތީޖާއަކުން ގްރީން ސްޓްރީޓްސް އަތުން މޮޅުވެފައިވާއިރު، 5-0 ގެ ނަތީޖާއަކުން ވަނީ ބުރު ސްޕޯޓްސް ކުލަބު އަތުން ބަލިވެފައެވެ.