ސައުދީ ޕްރޮފެޝަނަލް ލީގުގެ ޑިފެންޑިންގ ޗެންޕިއަން އަލް އިއްތިހާދުގެ އައު ހެޑް ކޯޗަކަށް ޕޯޗުގީޒް ކޯޗު ސާޖިއޯ ކޮންސެއިސާއޯ ގެނައުމަށް އެ ކްލަބުން އެއްބަސްވެފައިވާކަމަށް ރިޕޯޓްތައް ބުނަންފަށައިފިއެވެ.

އެގޮތުން މިހާރު ދެ ފަރާތުގެ މަޝްވަރާތައް ވަނީ ފަހު މަރުހަލާގައެވެ. އަދި ހަމައެކަނި ނިންމަން ޖެހިފައިވަނީ އެއްބަސްވުމުގެ މުއްދަތެވެ. އެގޮތުން މި އެއްބަސްވުން ދެ އަހަރު ދުވަހުގެ މުއްދަތަށް ވެވޭނެ ކަމަށް ލަފާކުރެވެއެވެ.

Ad by Hajj Corporation

ޕޯޓޯގައި ކާމިޔާބު ހަތް އަހަރެއް ހޭދަކުރުމަށްފަހު މިދިޔަ އަހަރު އޭސީ މިލާނުގެ ކޯޗުކަމާއި ހަވާލުވި ކޮންސެއިސާއޯ ވަނީ މިއަހަރުގައި ކޯޗުކަމުން ވަކިކޮށްފައެވެ. އަލް އިއްތިހާދުން ކޮންސެއިސާއޯ ހޮވާފައިވަނީ މި ސީޒަންގައި ސައުދީ ލީގާއި އޭޝިއަން ޗެމްޕިއަންސް ލީގުގައި ކްލަބަށް ދިމާވެފައިވާ ދަތި ހާލަތުން އަރައިގަތުމަށް އެންމެ އެކަށީގެންވާ ކޯޗެއްގެ ގޮތުގައެވެ.

ދެ ފަރާތުގެ މެދުގައި ރަސްމީ އެއްބަސްވުމުގައި ސޮއިކުރުމަށްފަހު އެކަން ރަސްމީކޮށް އިއުލާންކުރާނެ ކަމަށް ބެލެވެއެވެ.