ފީފާއިން ބާއްވާ ކުލަބް ތަކުގެ އެންމެ މަތީ ފަންތީގެ މުބާރާތްކަމަށްވާ ކްލަބް ވޯލްޑް ކަޕުގައި ބޮޑެތި ޓީމުތަކަށް ވާދަކުރުމުގެ ފުރުސަތު ކަށަވަރުކުރުމަށްޓަކައި ފީފާއިން މުބާރާތުގެ ގަވާއިދަށް ބަދަލުތަކެއް ގެންނަން ނިންމައިފިއެވެ.

އިތުބާރުހުރި މަސްދަރުތަކުން ހާމަކުރާ ގޮތުގައި، ކުރިއަށް އޮތް މުބާރާތުގައި ކޮންމެ ގައުމަކުން ބައިވެރިވެވޭ ޓީމުތަކުގެ އަދަދު ތިނަކަށް އިތުރުކުރުމަށް ފީފާއިން ވަނީ ނިންމާފައެވެ. މި ބަދަލާއެކު ލިވަޕޫލް، ބާސެލޯނާ އަދި ނަޕޯލީ ފަދަ ބޮޑެތި ކްލަބްތަކަށް މުބާރާތުގައި ބައިވެރިވުމުގެ ފުރުސަތު އިތުރުވެގެންދާނެއެވެ.

Ad by Hajj Corporation

މި އަހަރުގެ ފަހުކޮޅު ބޭއްވުނު އައު ފޯމެޓްގެ ފުރަތަމަ ކްލަބް ވޯލްޑް ކަޕުގައި 32 ޓީމު ބައިވެރިވެ، ޗެމްޕިއަންކަން ހޯދީ ޗެލްސީންނެވެ. މި މުބާރާތުގައި ދުނިޔޭގެ ހުރިހާ ބައްރަކުން ޓީމުތައް ބައިވެރިވިއެވެ.

ނަމަވެސް، ވޭތުވެދިޔަ ސީޒަންތަކުގެ ޔޫރަޕިއަން ކޮއެފިޝަންޓް އަދި ފާއިތުވި ހަތަރު އަހަރު ޗެމްޕިއަންސް ލީގް އަދި ޔޫރަޕުގައި ޓީމުގެ ޕާފޯމެންސް އަށް ބަލާފައި އެކުލަވާލެވުނު ކޮލިފިކޭޝަން މިންގަނޑުގެ ސަބަބުން ލިވަޕޫލް އަދި ބާސެލޯނާ ފަދަ ބޮޑެތި ޓީމުތަކަށް މުބާރާތުގައި ބައިވެރިނުވެވުނެވެ.

ކޮންމެ ގައުމަކުން ބައިވެރިވެވޭ ޓީމުތަކުގެ އަދަދު އިތުރުކުރުމާ ގުޅިގެން މުބާރާތުގައި ބައިވެރިވާ ޖުމްލަ ޓީމުތަކުގެ އަދަދު 32 އަށްވުރެ އިތުރުވެގެންދާނެއެވެ. އަދި މިއާއެކު މުބާރާތުގައި ކުޅެންޖެހޭ މެޗުތަކުގެ އަދަދުވެސް އިތުރުވެގެންދާނެއެވެ.