ކެއްސާތީ ބޭނުންކުރާ ބޭހެއް ކަމަށްވާ ކޮފްސީ ސިރަޕްގައި މައްސަލައެއް ނެތުމުން އެ ބޭސް ބޭނުން ކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން އަލުން ދީފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ކޮފްސީ ބޭނުންކުރުން މަނާކޮށްފައި އޮތް އޮތުން އުވާލީ ވަގުތީ ގޮތުން އިމްޕޯޓުކުރުމާއި ވިއްކުން އަދި ބޭނުންކުރުން މަނާކޮށްފައިވާ އެ ބޭސް މާކެޓުން ލިބެން ހުރި ބެޗުތަކުގެ ސާޕަލްނަގާ އިތުރަށް ޓެސްޓުކޮށްފައެވެ. އެމްއެފްޑީއޭ އިން މިއަދު ނެރުނު ބަޔާނެއްގައި ބުނީ، އެ ބޭހާއި ގުޅިގެން ބަލަން ޖެހޭ ބެލުންތައް ބެލުމަށްފަހު ބޭހުގައި މައްސަލައެއް ނެތްކަން ފާހަގަކުރެވިފައިވެއެވެ.

"އެހެންކަމުން މި ބޭސް އެތެރެކުރުމާއި ވިއްކުމާއި ބޭނުންކުރުމަކީ ހުއްދަ ކަމެއް،" އެމްއެފްޑީއޭ އިން ބުންޏެވެ.

ކޮފްސީ ސިރަޕް ވަގުތީ ގޮތުން މަނާކުރީ މި މަހުގެ 19 ވަނަ ދުވަހު ސިރަޕުން ކުނޑިކޮޅުތަކެއް ހުރި ކަމަށް ފާހަގަވެފައިވާތީ އެ ބޭހުގެ ރައްކާތެރިކަން ކަށަވަރުކުރުމަށްޓަކައެވެ.

އިންޑިއާގެ އެމްއެމްސީ ހެލްތްކެއާ ލިމިޓެޑުން އުފެއްދި ކޮފްސީ ސިރަޕަކީ މިއުކަސް ބޭނުންކޮށްގެން ކެއްސުމަށް ބޭނުންކުރާ ކޮމްބިނޭޝަން ބޭހެއް ކަމަށާއި ނޭފަތުން ފެންއައުން، ކިނބިހި އެޅުން، ރިއްސުން އަދި ލޮލުގައި ފެން އައުން ފަދަ އަލާމާތްތައް ވެސް ލުއިކޮށްދޭ ބޭހެކެވެ.