އަންނަ އަހަރު އެމެރިކާ، ކެނެޑާ އަދި މެކްސިކޯގައި ބާއްވާ ފީފާ ވޯލްޑް ކަޕުގެ ގުރުނެގުމުގެ ރަސްމިއްޔާތުގައި ބައިވެރިވުމަށް އެމެރިކާއަށް ދިޔަ އީރާނުގެ ޑެލިގޭޝަނަށް ވިސާ ނުދިން މައްސަލަ ފެންމަތިވެއްޖެއެވެ.

އިރާންގެ އޮފިޝަލުންނާ ހަވާލާދީ ރިޕޯޓުތައް ބުނާގޮތުން، ޑިސެމްބަރު މަހުގެ ފަސް ވަނަ ދުވަހު އެމެރިކާގައި ބާއްވާ ގުރު ނެގުމުގެ ރަސްމިއްޔާތަށް ދިއުމަށް ނުވަ މީހަކަށް ވިސާ އަށް އެދުނު ނަމަވެސް އެކަން ނުވިއެވެ. މިހެންވެ މިކަން މިހާރު ފީފާއަށް ވަނީ ހުށަހަޅާފައެވެ.

Ad by Hajj Corporation

އެމެރިކާއަށް ދިއުމަށް ވިސާއަށް ހުށަހަޅާފައިވާ މީހުންގެ ތެރޭގައި އީރާން އެފްއޭގެ ރައީސް، މެހްދީ ތާޖް އަދި ގައުމީ ޓީމުގެ ކޯޗު އާމިރު ހިމެނެއެވެ.

އެމެރިކާގެ މިހާރުގެ ރައީސް ޑޮނަލްޑް ޓްރަމްޕް އެ ގައުމަށް މީހުން އެތެރެވުން ހަރުކަށި ކޮށްފައިވާ 12 ގައުމުގެ ތެރޭގައި އީރާން ހިމެނެ އެވެ.  އީރާން ހިމެނެނީ ފުލް ބޭން ނުވަތަ އެއްވެސް ހާލަތެއްގައި އެމެރިކާއަށް އެތެރެނުވެވޭނެ ތިން ގައުމުގެ ތެރޭގައެވެ. އެ ލިސްޓުގައި ދެން ހިމެނެނީ ނޯތު ކޮރެއާ އާއި ސީރިއާއެވެ.
މިދިޔަ މަހު ފީފާގެ ރައީސް ޖިއާނީ އިންފަންޓީނޯ ވަނީ އެއްވެސް ގައުމަކަށް އެމެރިކާ އަށް ދިއުމަށް ދަތިތަކެއް ހުރިނަމަ އެކަން ހައްލުކޮށް ދެއްވަން މަސައްކަތް ކުރައްވާނެ ކަމަށް ވިދާޅުވެފަ އެވެ.

އެމެރިކާގެ ރައީސް ކަމަށް ދެ ވަނަ ފަހަރަށް ވަޑައިގެންނެވި ފަހުން ޓްރަމްޕް ގެންދަވަނީ ކުޅިވަރުގެ ބޮޑެތި އިވެންޓްތަކުގައި ވަރަށް ބޮޑަށް ބައިވެރިވެވަޑައިގަންނަވަމުންނެވެ. މި ގޮތުން އެމެރިކާ އާއި މެކްސިކޯ އަދި ކެނެޑާ ގުޅިގެން ބާއްވާ ވޯލްޑް ކަޕަށް އޭނާ ވަރަށް ބޮޑު ސަމާލުކަމެއް ދެއްވަ އެވެ. ނަމަވެސް އެމެރިކާގެ "ސަލާމަތަށް"ޓަކައި ކަމަށް ބުނެ ބައެއް ގައުމުތަކާ މެދު އޭނާގެ ސަރުކާރުން ދަނީ ވަރަށް ހަރުކަށި އުސޫލުތައް އާއްމު ކުރައްވާފަ އެވެ.