ރާއްޖޭގައި ޑިޖިޓަލް ސިއްހީ ނިޒާމެއް ގާއިމުވުމުން އެ މީހެއްގެ ސިއްހީ ހާލަތު އަންގައިދޭ އެލާމްތައް އެސްއެމްއެސް މެދުވެރިކޮށް ފޮނުވާނެކަމަށް ހެލްތު މިނިސްޓަރު އަބްދުالله ޚަލީލް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޑިޖިޓަލައިޒޭޝަންގެ މުހިންމުކަމުގެ މައްޗަށް އަލިއަޅުއްވާލައްވައި އދ.ގެ 79 ވަނަ އާންމު މަޖިލީހުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވި ޚިޠާބުގެ މައްޗަށް ދައުލަތުގެ މީޑިއާއިން އާދީއްތަ ދުވަހުގެ ރޭ ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ.

މިނިސްޓަރު ޚަލީލް ވިދާޅުވީ ރާއްޖޭގެ ރައްޔިތުންގެ ސިއްޙީ ހާލަތު ދެނެގަތުމަށާއި އެމީހުންގެ މެޑިކަލް ރެކޯޑްބެލެހެއްޓުމުގައި ދަތިތަކެއް ދިމާވަނީ ކޮންސޮލިޑޭޓެޑް ސިއްހީ ތަފްސީލުތައް ހިމެނޭ ޕްލެޓްފޯމެއް ނެތުމުން ކަމަށެވެ.

މިސާލެއްގެ ގޮތުން މިނިސްޓަރ ފާހަގަކުރެއްވީ ހޮސްޕިޓަލެއްގައި ޓެސްޓުތައް ހެދުމަށް ފަހު އެހެން ހޮސްޕިޓަލަކަށް ދާ ބަލި މީހަކަށް އެ ޓެސްޓު ތަކުރާރުކުރަން މަޖުބޫރުވަނީ އެކަމުގެ ރެކޯޑެއް ނެތުމުން ކަމަށެވެ. ނަތީޖާއެއްގެ ގޮތުން ބަލިމީހާއަށް ދޭންޖެހޭ ފަރުވާ ލަސްވެ، ޚަރަދުތަކާ ގުޅޭ ގޮތުން ދައުލަތުގެ ބުރަވެސް ބޮޑުވާ ކަމަށް މިނިސްޓަރު ވިދާޅުވި އެވެ.

ރާއްޖޭގައި މަސައްކަތް ކުރުމަށް ރެކްރޫޓްކުރާ ޑޮކްޓަރުން ދިގު މުއްދަތަކަށް ނުބޭތިއްބޭތީ މެޑިކަލް ރެކޯޑް ބެލެހެއްޓުމަށް ދިމާވި އެންމެ ބޮޑު އެއް ހުރަހަކީ އޭގެ ތެރެއިން ގިނަ ޑޮކްޓަރުން އެއް އަހަރު ފަހުން ގައުމު ދޫކޮށް ދާތީ ކަމަށް ވެސް މިނިސްޓަރު ވިދާޅުވި އެވެ. އަދި މިކަމަށް އޮތް ހައްލަކީ ޑިޖިޓަލް އިޤްތިޞާދަކަށް ރާއްޖެ ބަދަލުކުރުން ކަމަށާއި، ޑިޖިޓަލް ޞިއްޙީ ނިޒާމެއް ޤާއީމް ކުރުން ކަމަށް ވެސް މިނިސްޓރ ވިދާޅުވިއެވެ.

އެގޮތުން ކޮންމެ މީހެއްގެ މެޑިކަލް ރެކޯޑްތައް މި ސިސްޓަމް މެދުވެރިކޮށް ޕަބްލިކް އަދި ޕްރައިވެޓް ހޮސްޕިޓަލްތަކާއި ކްލިނިކްތަކުން ބެލެހެއްޓޭނެ ކަމަށް މިނިސްޓަރު ވިދާޅުވިއެވެ. އަދި ސިއްހީ ޚިދުމަތްދޭ ތަންތަނުގައި ބަލި މީހާ ހަދާ ޓެސްޓުތަކުގެ ނަތީޖާ އެސްއެމްއެސް މެދުވެރިކޮށް އަންގާނެ ކަން ފާހަގަކުރެއްވި އެވެ.

ޑިޖިޓަލް ހެލްތު ސިސްޓަމް މިހާރު ތަރައްޤީ ކުރަމުން އަންނައިރު އެ މަސައްކަތް ނިމުމުން އުފަންދުވަހުން ފެށިގެން މިއަދާ ހަމައަށް ބަލި މީހުންގެ މެޑިކަލް ރެކޯޑްތައް އެ ސިސްޓަމުން ލިބެން ހުންނާނެ ކަމަށް ވެސް މިނިސްޓަރު ވިދާޅުވި އެވެ.