ބާސެލޯނާގެ މާލީ ދަތިތައް އަދިވެސް ހައްލުނުވެ އޮތްކަން އެ ކުލަބުގެ އެންމެ ފަހުގެ މާލީ ރިޕޯޓުން ހާމަވެއްޖެއެވެ. އެގޮތުން ޑިއާރިއޯ އޭއެސްއިން ހާމަކުރި ގޮތުގައި، ތިން އަހަރަށްވުރެ ކުރިން ގަތް ކުޅުންތެރިންގެ ފައިސާގެ ގޮތުގައި 159 މިލިއަން ޔޫރޯ އެހެން ކުލަބުތަކަށް ދައްކަން އަދިވެސް އެބައޮތެވެ.

މި ދަރަނީގެ ތެރެއިން އެންމެ ބޮޑު އަދަދެއް ދައްކަން ޖެހެނީ ލީޑްސް ޔުނައިޓެޑަށެވެ. އެއީ ރަފިންހާ ގަތުމަށް ދައްކަންޖެހޭ 41.9 މިލިއަން ޔޫރޯއެވެ. މީގެ އިތުރުން ބަޔަން މިއުނިކަށް ރޮބަޓް ލެވަންޑޮވްސްކީ ގަތުމަށް 20 މިލިއަން ޔޫރޯ އަދި ސެވިއްޔާއަށް ޖުލްސް ކޮންޑޭ ގަތުމަށް 24.5 މިލިއަން ޔޫރޯ ދައްކަން އެބައޮތެވެ.

Ad by Hajj Corporation

މީގެ އިތުރުން މެންޗެސްޓަރ ސިޓީއަށް ފެރަން ޓޯރެސް ގަތުމަށް 13.3 މިލިއަން ޔޫރޯ އަދި ރެއަލް ބެޓިސްއަށް އެމަރސަން ރޯޔަލް ގަތުމަށް 6 މިލިއަން ޔޫރޯ ދައްކަން އެބައޮތެވެ. އަދި ރެންސް، ޖިރޯނާ، ވެލެންސިއާ އަދި ސްޕޯޓިންގ ސީޕީއަށްވެސް ކުދި އަދަދުތަކެއް ދައްކަން އެބައޮތެވެ.

މި ދަރަނީގެ ތެރެއިން 140.6 މިލިއަން ޔޫރޯއަކީ އަހަރެއްގެ ތެރޭގައި ދައްކަންޖެހޭ ކުރު މުއްދަތުގެ ދަރަންޏެވެ. އަދި 18.5 މިލިއަން ޔޫރޯއަކީ ދިގު މުއްދަތުގެ ދަރަންޏެވެ. ނަމަވެސް ބާސެލޯނާއަށްވެސް އެހެން ކުލަބުތަކުން ޖުމުލަ 64.1 މިލިއަން ޔޫރޯ ލިބެން އެބައޮތެވެ. މީގެ ތެރޭގައި އެފްސީ ޕޯޓޯއިން ނިކޯ ގޮންޒާލެޒްއަށް 6.7 މިލިއަން ޔޫރޯ، އަލް އަހުލީން ކެސީއަށް 4.1 މިލިއަން ޔޫރޯ އަދި ޝަހުތާ ޑޮނެޓްސްކުން މާލޮންއަށް 3.1 މިލިއަން ޔޫރޯ ހިމެނެއެވެ.

މި މާލީ ހާލަތު މިހެން އޮތްނަމަވެސް، ބާސެލޯނާއިން އެ ކުލަބުގެ މާލީ ރިކަވަރީ ޕްލޭނާމެދު އިތުބާރު ކުރާކަމަށް ބުނެއެވެ. އަދި ކުރިއަށް އޮތް ތަނުގައި އާމްދަނީ އެއް ބިލިއަން ޔޫރޯއަށްވުރެ މަތިވާނެ ކަމަށް ލަފާކުރެއެވެ.