ޖަޕާނުގެ އަޖިނޮމޯޓޯ ސްޓޭޑިއަމްގައި ކުޅުނު ފުރެންޑްލީ މެޗުގައި ބްރެޒިލްގެ 2 ލަނޑުގެ ލީޑް ފުރޮޅާލައި، ޖަޕާން 3-2 އިން މޮޅުވެ، ތާރީޚީ ކާމިޔާބީއެއް ހޯދައިފިއެވެ. މި މޮޅާއެކު ޖަޕާނުން ވަނީ ފުރަތަމަ ފަހަރަށް ބްރެޒިލް ބަލިކޮށްފައެވެ.

މެޗުގެ ފުރަތަމަ ބައިގައި ބްރެޒިލް ވަރަށް ފޯމުގައި ކުޅުނެވެ. 25 ވަނަ މިނެޓްގައި ޕައުލޯ ހެންރިކް ލަނޑެއް ޖަހައި، 32 ވަނަ މިނެޓްގައި ގެބްރިއެލް މާޓިނެލީ އިތުރު ލަނޑެއް ޖެހުމުން ބްރެޒިލް 2-0 އިން ލީޑުނެގިއެވެ.

Ad by Hajj Corporation

ނަމަވެސް ދެވަނަ ހާފުގައި ޖަޕާނުގެ ކުޅުން ބަދަލުވެގެން ދިޔައެވެ. 52 ވަނަ މިނެޓްގައި ތަކުމި މިނަމިނޯ ލަނޑެއް ޖަހައި، 62 ވަނަ މިނެޓްގައި ބްރެޒިލްގެ ފެބްރިސިއޯ ބްރޫނޯގެއަތުން ބައިކޮޅަށް ވަތް ގޯލަކުން ނަތީޖާ ހަމަހަމަ ކުރިއެވެ. އަދި 71 ވަނަ މިނެޓްގައި އަޔާސެ އުއެދާ ޖެހި ލަނޑުން ޖަޕާން ލީޑުނަގައި، އެ ލީޑް ނިމެންދެން ހިފެހެއްޓިއެވެ.

"މިއީ ޖަޕާނުގެ ފުޓްބޯޅައަށް ވަރަށް މުހިންމު ކާމިޔާބީއެއް. މީގެ ކުރިން 9 ފަހަރު ބްރެޒިލްއާ ކުޅެ، 7 މެޗް ބަލިވެ، 2 މެޗް ޑްރޯ ވެފައިވަނިކޮށް މިއަދު މި ލިބުނީ ފުރަތަމަ މޮޅު،" ޖަޕާނުގެ ކޯޗް ވަނީ ބުނެފައެވެ.

މި މޮޅާއެކު ޖަޕާނުގެ އަމިއްލަ ދަނޑުގައި ބަލިނުވެ ދިޔުމުގެ ރެކޯޑް 21 މެޗަށް ވަނީ ދިގުދެމިގެން ގޮސްފައެވެ. އެންމެ ފަހުން ޖަޕާން އަމިއްލަ ދަނޑުގައި ބަލިވެފައިވަނީ 2023 ވަނަ އަހަރުގެ މާރިޗް މަހު ކޮލަމްބިއާއާ ދެކޮޅަށް ކުޅުނު މެޗުގައެވެ.