ވަގަށް އެތެރެކުރަނިކޮށް، ކަސްޓަމްސް އިން ހިފަހައްޓައި މޯލްޑިވްސް ޕޯޓްސް ލިމިޓެޑް- އެމްޕީއެލް ހުޅުމާލޭ ބަނދަރުގައި ބަހައްޓާފައިހުރި ސިނގިރެޓްތައް ގެއްލުނު މައްސަލައިގައި 14 މީހަކު ފުރުން މަނާކޮށް، ހަތަރު މީހަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން ބުނީ، މިއަހަރުގެ އޭޕްރިލް މަހުގެ 26 ވަނަ ދުވަހު ކަސްޓަމްސް އިން ހިފެހެއްޓި ދެ ކޮންޓެއިނަރު ސިނގިރޭޓު، އެމްޕީއެލްގެ ހުޅުމާލެ ޓާމިނަލުގައި ބަހައްޓާފައި ހުއްޓާ ވަގަށް ނެގި މައްސަލަ، މި މަހުގެ ނުވަވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.

Ad by Hajj Corporation

މި މައްސަލަ މިހާރު އެ މުއައްސަސާއިން ތަހުގީގުކުރަމުން އަންނައިރު، މިހާތަނަށް 12 މީހަކު ފުރުން މަނާކޮށްފައިވާނެ ކަމަށާއި، މި މައްސަލައިގައި ހަތަރު މީހަކު މިރޭގެ ވަގުތެއްގައި ހައްޔަރުކޮށްފައިވާ ކަމަށް ވެސް ފުލުހުން ބުނެފައިވެއެވެ.

ހައްޔަރުކޮށްފައިވާ ހަތަރު މީހުންނަކީ، މި މައްސަލައާ ގުޅިގެން، އެކަން ރާވައި، ހިންގުމުގައި އިސްކޮށް ހަރަކާތްތެރިވިކަމަށް ތުހުމަތުކުރެވޭ މީހުންކަމަށް ފުލުހުންގެ މީޑީއާ އޮފިސަރު ވިދާޅުވެފައިވެއެވެ.

ހައްޔަރުކުރި މީހުންގެ ތެރޭގައި ހިމެނެނީ ދެ ވިޔަފާރިވެރިއަކާއި ކަސްޓަމްސްގެ އިސް އޮފިސަރެއްގެ އިތުރުން، އިތުރު މީހަކު ކަމަށް ފުލުހުން މައުލޫމާތުދެއެވެ.

މި މައްސަލައާ ގުޅިގެން މިރޭ ވެސް އޮޕަރޭޝަނެއް ކުރިއަށް ގެންގޮސްފައިވާއިރު، ބައެއް އުޅަނދުތަކާއި ތަންތަން ވެސް ބަލައި ފާސްކޮށްފައިވެއެވެ.

މި މައްސަލަ އިތުރަށް ތަހުގީގުކުރަމުންދާއިރު، ތަހުގީގުގެ ތެރެއިން ލިބޭ މިންވަރަކުން އިތުރު މައުލޫމާތު ފޯރުކޮށްދެމުންދާނެކަމަށް ފުލުހުންގެ މީޑިއާ އޮފިސަރު ވިދާޅުވިއެވެ.