ހދ. ހަނިމާދޫގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި މީހަކު ހައްޔަރުކޮށްފައިވާކަމަށް ފުލުހުން ބުރާސްފަތި ދުވަހުގެ ރޭ ބުނެފިއެވެ.

ފުލުހުން މީޑިއާތަކަށް ފޮނުވި މެސެޖެއްގައި ބުނީ މި މައްސަލައިގެ ތުހުމަތުގައި ހައްޔަރުކޮށްފައި ވަނީ ހދ. ހަނިމާދޫ/ޑޯން ޝައިން، އަހްމަދު އަޒުމީ (40 އަހަރު) ކަމަށެވެ.

Ad by Hajj Corporation

މީނާ ހައްޔަރުކޮށްފައި ވަނީ 2025 ވަނަ އަހަރުގެ އޮކްޓޯބަރ މަހުގެ 15 ވަނަ ދުވަހު ހިންގި އޮޕަރޭޝަނެއްގައެވެ.

ފުލުހުން މައުލޫމާތު ދީފައިވާގޮތުގައި، އެ މީހާ ހައްޔަރުކޮށްފައިވަނީ އިންޓެލިޖެންސްއަށް ލިބުނު ވަރަށް މުހިންމު މައުލޫމާތަކާ ގުޅިގެން ހަނިމާދޫގައި ހިންގި ހާއްސަ އޮޕަރޭޝަނެއްގައެވެ. މަސްތުވާތަކެތި ވިއްކުމުގެ ބޮޑެއްކަމަށް ބެލެވޭ މިމީހާ ހައްޔަރުކުރިއިރު އޭނާ ހުރި ތަނުން މަސްތުވާތަކެތި ކަމަށް ބެލެވޭ 6 ރަބަރު ޕެކެޓް ފެނިފައިވެއެވެ.

ފުލުހުން އިތުރަށް މައުލޫމާތު ދެއްވިގޮތުގައި، ފެނުނު މަސްތުވާތަކެތީގެ ވަގުތީ ބަރުދަނުގައި 8.2 ގްރާމް ހުރިއިރު، މި މައްސަލައިގެ ތަހުގީގަށްޓަކައި އެމީހާ ކޯޓަށް ހާޒިރުކުރުމުން އޭނާ ފަސް ދުވަހުގެ މުއްދަތަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލައިގެ ތަހުގީގު ދިވެހި ފުލުހުންގެ ޚިދުމަތުން ދަނީ މިހާރުވެސް ކުރިއަށް ގެންދަމުންނެވެ.

މި މީހާ އަކީ މީގެ ކުރިން ވެސް މިފަދަ މައްސަލައެއްގައި ހައްޔަރުކޮށްފައިވާ މީހެކެވެ. އޭނާ އަކީ އެރަށުގައި މަސްތުވާތަކެތީގެ ވިޔަފާރީގެ ބޮޑެއްކަމަށް ބެލެވޭއިރު ބައެއް މީހުން އޭނާ އަށް ކޮލަމްބިއާގެ ބޮޑު ޑްރަގް ޑީލަރ ''އެސްކޮބާ''ގެ ނަމުން ވެސް މުޚާތަބުކުރާކަމަށް ވެއެވެ.