ޝަންހާއީ، ޗައިނާ (19 އޮކްޓޯބަރު 2025) – ޗައިނާގެ ހަންގްޒޫ އިން ސައުތު ކޮރެއާގެ އިންޗިއޮން އަށް ދަތުރުކުރި އެއަރ ޗައިނާގެ ފްލައިޓް CA139 ގައި، މަތީ ކޮމްޕާޓްމަންޓެއްގައި ހުރި ލިތިއަމް ބެޓެރީއެއްގައި އަލިފާން ރޯވެ، ޝަންހާއީ ޕުޑޮންގް އިންޓަރނޭޝަނަލް އެއަރޕޯޓަށް ކުއްލި ހާލަތުގައި ޖައްސަން ޖެހިއްޖެއެވެ.

މި ހާދިސާއާ ގުޅިގެން އެއަރލައިނުން ބުނެފައި ވަނީ، ފްލައިޓްގެ ކްރޫން ވަގުތުން އަލިފާންގަނޑު ކޮންޓްރޯލް ކޮށްފައިވާ ކަމަށެވެ. އަދި ދަތުރުކުރި ފަސިންޖަރުންނާއި މުވައްޒަފުންގެ ސަލާމަތީ ކަންކަން ކަށަވަރު ކުރުމަށްޓަކައި، މަތިންދާބޯޓު ޝަންހާއީއަށް އަނބުރާ ޖެއްސީކަމަށް ވެސް ބުނެފަވެއެވެ.

Ad by Hajj Corporation

މިކަމުގެ ސަބަބުން ދަތުރުގެ ލަސްވުމެއް ދިމާވިއަސް، އެއަށްވުރެ މުހިންމީ ދަތުރުކުރާ އެންމެންގެ ސަލާމަތް ކަމަށް އެއަރލައިނުން ފާހަގަކޮށްފައިވެއެވެ.

މި ހާދިސާގައި ދަތުރުކުރި އެއްވެސް މީހަކަށް އަނިޔާއެއް ލިބިފައެއް ނުވެއެވެ.

ލިތިއަމް ބެޓެރީތަކުގައި އަލިފާން ރޯވެދާނެ އެތައް ސަބަބުތަކެއް ހުރެއެވެ. މި ތަކެތީގައި އަލިފާން ރޯވާ މައިގަނޑު ސަބަބުތަކުގެ ތެރޭގައި ބެޓެރީއަށް ގެއްލުންވުން، އާދަޔާ ޚިލާފަށް ހޫނުވުން، ފެނަށް އެޅުން ނުވަތަ ގޯސްކޮށް ޕެކްކުރުން ހިމެނެއެވެ.

ސްމާޓްފޯނާއި، ލެޕްޓޮޕް، ޓެބްލެޓް އަދި ޕޯޓަބަލް ޕަވަރ ބޭންކް ފަދަ އާއްމު ބޭނުންކުރާ އެތައް އިލެކްޓްރޯނިކް ތަކެއްޗެއްގައި ލިތިއަމް ބެޓެރީ ހުންނަ ކަމަށް ވެއެވެ. މިފަދަ ހާދިސާތައް ހިނގުން މަދުކުރުމުގެ ގޮތުން، ގިނަ އެއަރލައިންތަކުން ޗެކްކުރާ ބޭގްތަކުގައި ލިތިއަމް ބެޓެރީތައް ގެންގުޅުން މަނާކުރެއެވެ. އެހެންކަމުން، ފަސިންޖަރުންނަށް ލަފާދެނީ މިފަދަ ތަކެތި ހިފައިގެން ދަތުރުކުރުމުގައި އެއަރލައިންގެ އުސޫލުތަކަށް ސަމާލުވުމަށެވެ.