ރިޔާދު، ސައޫދީ އަރަބިއްޔާ 18 އޮކްޓޯބަރު 2025 – ދުނިޔޭގެ އެންމެ ބޮޑެތި މުނިފޫހިފިލުވުމުގެ ސިނާއަތުގެ އެއްވުންތަކުގެ ތެރެއިން އެއް އެއްވުން ކަމުގައިވާ ޖޯއި ފޯރަމް 2025، 4 ބިލިއަން ސައޫދީ ރިޔާލުގެ އެއްބަސްވުންތަކާއެކު ބުރާސްފަތި ދުވަހު ސައޫދީ އަރަބިއްޔާގެ ވެރިރަށް ރިޔާދުގެ ބުލެވާޑް ސިޓީގައި ފަށައިފިއެވެ.

މި ދެ ދުވަހުގެ ފޯރަމް އިފްތިތާޙުކުރެއްވީ ސައޫދީ އަރަބިއްޔާގެ ޖެނެރަލް އެންޓަރޓެއިންމަންޓް އޮތޯރިޓީ (ޖީއީއޭ)ގެ ޗެއަރމަން، ތުރުކީ އަލްއަލްޝައިޚެވެ. އޭނާ ބައިނަލްއަޤްވާމީ މެހުމާނުންނަށް މަރުޙަބާ ދެންނެވީ، ރިޔާދަކީ "ދުނިޔޭގެ މުނިފޫހިފިލުވުމުގެ ވެރިރަށް" ކަމަށް ސިފަކުރައްވަމުންނެވެ.

Ad by Hajj Corporation

އިފްތިތާޙީ ތަޤުރީރުގައި އަލްއަލްޝައިޚް ވިދާޅުވީ، 4 ބިލިއަން ސައޫދީ ރިޔާލުގެ އެއްބަސްވުންތަކެއް ސޮއިކުރެވިފައިވާ ކަމަށެވެ. މީގެ ތެރޭގައި ބޮޑެތި އިވެންޓްތަކަކާއި ދުނިޔޭގެ ފެންވަރުގެ ބައިވެރިވުންތަކެއް ހިމެނެއެވެ. އޭނާ ފާހަގަކުރެއްވި ގޮތުގައި 2016 ގައި ވިޝަން 2030 ގެ ދަށުން ފެށުނު ދަތުރަކީ "ކުރު މުއްދަތެއްގައި ގިނަ ކާމިޔާބީތަކެއް ހޯދި" ދަތުރެކެވެ. މިކަމުގެ ސަބަބުން ސައޫދީ އަރަބިއްޔާ ވަނީ ދުނިޔޭގެ އެންމެ އިސް ފަންތީގެ މުނިފޫހިފިލުވުމާއި ފަތުރުވެރިކަމުގެ މަންޒިލުތަކުގެ ތެރެއިން އެއް މަންޒިލަކަށް ވެފައިކަމަށް އޭނާ ވިދާޅުވިއެވެ.

އަލްއަލްޝައިޚް ޔަޤީންކަން ދެއްވީ މި އަހަރު ''ޤިއްދިޔާ މަޝްރޫޢު''ގެ ފުރަތަމަ ފިޔަވަހި ހުޅުވޭނެ ކަމަށެވެ. މީގެ ތެރޭގައި ''ސިކްސް ފްލެގްސް ޤިއްދިޔާ'' ހިމެނެއެވެ. މިއީ ސައޫދީ ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާންގެ އެންމެ މުހިންމު އެއް މަޝްރޫޢެވެ. އޭނާ ސައޫދީ ވެރިކަމުގެ ދެމެހެއްޓެނިވި އެހީތެރިކަން ފާހަގަކުރެއްވިއެވެ. އަދި މިއީ ސައޫދީ އަރަބިއްޔާގެ އަވަސް ބަދަލުތަކަށް މަގުފަހިކޮށްދިން ކަމެއް ކަމުގައި ވިދާޅުވިއެވެ.

އޭނާ ވަނީ ހަމައެހެންމެ ފަތުރުވެރިކަމުގެ ވުޒާރާއާއެކު އޮންނަ ވަރުގަދަ ގުޅުމަށް ތައުރީފުކުރައްވާފައެވެ. މި ވުޒާރާ ހިންގަވަނީ ވަޒީރު އަޙްމަދު އަލްޚަޠީބް، ނައިބު ވަޒީރު އަމީރާ ހައިފާ ބިންތު މުޙައްމަދު އާލް ސައޫދު، އަދި ސައޫދީ ޓޫރިޒަމް އޮތޯރިޓީގެ ސީއީއޯ ފަހުދު ޙަމީދައްދީނެވެ. މިފަދަ މަސައްކަތްތަކުގެ ސަބަބުން ފާއިތުވި އަހަރު ސައޫދީ އަރަބިއްޔާއަށް ސަރަޙައްދުގެ ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައި ވާކަމަށް އޭނާ ވިދާޅުވިއެވެ.

ސައުދީ ޖޯއީ ފޯރަމް 2025 އަކީ މުނިފޫހިފިލުވުމުގެ ދާއިރާއަށް އަމާޒުކޮށްގެން ބާއްވާ ގްލޯބަލް ޕްލެޓްފޯމަކާއި ބޮޑު އިވެންޓެކެވެ