ސްޓްރެއިޓް އޮފް ހޮރްމުޒް ނުވަތަ ހޮރްމުޒް ކަނޑުއޮޅީގެ ހަމަޖެހުން ގާއިމުކުރުމަށްޓަކައި ސަރަހައްދީ ގައުމުތަކުގެ މެދުގައި ގާތް ގުޅުމެއް ބޭއްވުމަށް އީރާނުގެ ފޮރިން މިނިސްޓަރު އައްބާސް އަރަގްޗީ ގޮވާލައްވައިފިއެވެ.

އަރަގްޗީ މިކަމަށް ގޮވާލެއްވީ އޮމާންގެ ފޮރިން މިނިސްޓަރު ބަދުރު އަލްބުސައިދީ އަދި ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އާއެކު ވަކިވަކިން ފޯނުން ކުރެއްވި މަޝްވަރާތަކެއްގައެވެ.

Ad by Hajj Corporation

އީރާނުގެ ދައުލަތުގެ މީޑިއާ އިން ރިޕޯޓްކޮށްފައިވާ ގޮތުގައި، މި މަޝްވަރާތަކުގައި އަރަގްޗީ ވަނީ ހޮރްމުޒް ކަނޑުއޮޅީގައި އުފެދިފައިވާ ނުތަނަވަސްކަމުގެ ޒިންމާ އެމެރިކާގެ މައްޗަށް އަޅުވާފައެވެ. އޭނާ ވިދާޅުވީ ކަނޑުއޮޅީގެ ހަމަޖެހުން ގެއްލެން މެދުވެރިވަނީ "އެމެރިކާގެ އުދުވާނީ އަމަލުތަކުގެ" ސަބަބުން ކަމަށެވެ. މި މަޝްވަރާތަކުގެ މައިގަނޑު ބޭނުމަކީ ކަނޑުއޮޅިން ދަތުރުކުރާ އުޅަނދުފަހަރަށް ރައްކާތެރިކަން ކަށަވަރުކޮށްދިނުމަށްޓަކައި އިންތިޒާމުތަކެއް ހަމަޖެއްސުމެވެ.

މި މައްސަލައިގައި އޮމާނުން ވަނީ ހޮރްމުޒް ކަނޑުއޮޅި ބެލެހެއްޓުމަށްޓަކައި ސަރަހައްދީ ގުޅިފައިވާ ނިޒާމެއް ގާއިމުކުރުމުގެ ހުށަހެޅުމެއް ހުށަހަޅާފައެވެ. މި ހުށަހެޅުމަކީ ސްޓްރެއިޓް އޮފް މަލަކާގައި އަމަލުކުރާ އުސޫލަށް ބިނާކޮށްފައިވާ ހުށަހެޅުމެކެވެ. މީގެ ދަށުން ކަނޑުއޮޅި ބޭނުންކުރާ ފަރާތްތަކުން ދައްކާ ފީއަކުން، ކަނޑު ދަތުރުފަތުރުގެ ސަލާމަތާއި، ތިމާވެށި ރައްކާތެރިކުރުމާއި، ސާޗް އެންޑް ރެސްކިއު އޮޕަރޭޝަންތަކަށް ހަރަދުކުރެވޭނެއެވެ.

މިދިޔަ ޖުލައި 11 އިން ފެށިގެން އެމެރިކާ އާއި އީރާނާ ދެމެދު ބަދަލުކުރަމުންދިޔަ ހަމަލާތަކަށްފަހު، މިދިޔަ ހުކުރު ދުވަހުން ފެށިގެން ސަރަހައްދަށް ވަނީ ކޮންމެވެސް ވަރެއްގެ ހަމަޖެހުމެއް އައިސްފައެވެ. މި ނުތަނަވަސްކަމުގެ ތެރޭގައި އެމެރިކާ އިން އީރާނުގެ އެތެރެއަށް ހަމަލާދީފައިވާއިރު، އީރާނުން ވަނީ އަރަބި ބައެއް ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދީފައެވެ.

އެމެރިކާ އިން ބާރުއަޅަމުންދަނީ އީރާނުން އުޅަނދުފަހަރަށް ހަމަލާދިނުން ހުއްޓާލައި، ކަނޑުއޮޅިން ދަތުރުކުރުމުގެ މިނިވަންކަން ކަށަވަރުކޮށްދިނުމަށެވެ. ނަމަވެސް އީރާނުން ބުނަމުންދަނީ އެ ގައުމުގެ އައްސޭރިފަށާ ކައިރި ސަރަހައްދުތަކުން ދަތުރުކުރާ އުޅަނދުފަހަރު ބަލަހައްޓަންވާނީ އީރާނުގެ ބެލުމުގެ ދަށުން ހިނގާ ނިޒާމެއްގެ ތެރެއިން ކަމަށެވެ.