ހޮނިހިރު ދުވަހުގެ ހެނދުނުގެ ވަގުތެއްގައި އިންޑޮނޭޝިއާއަށް އައި 7.7 މެގްނިޓިއުޑްގެ ބާރުގަދަ ބިންހެލުމެއްގައި މީހަކު މަރުވެއްޖެއެވެ.

މި ބިންހެލުމާ ގުޅިގެން ފްލޯރެސް އައިލެންޑްގެ މައި ރަށް ކަމަށްވާ މައުމޭރޭގެ ގިނަ އަދަދެއްގެ މީހުން ވަނީ ބިރުން މަގުތަކަށް ނުކުމެފައެވެ.

Ad by Hajj Corporation

ޕޯޓުގައި ނަގާފައިވާ ވީޑިއޯއަކުން ފެންނަ ގޮތުގައި، ފެރީއަށް އަރަން މަޑުކޮށްގެން ތިބި ފުރާނަތަކުގެ މައްޗަށް ޓާމިނަލް އިމާރާތުން ބޮޑެތި ސިމެންތި ބުރިތައް ވަނީ ވެއްޓިފައެވެ. އަދި ބޯޓަށް އަރަން އޮތް ގޭންގްވޭ ވެއްޓުމުގެ ސަބަބުން ބައެއް މީހުން ވަނީ މޫދަށް ވެއްޓިފައެވެ. ކާރިސާއާ ގުޅިގެން ސުނާމީގެ އިންޒާރު ނެރުމުން، ގިނަ އަދަދެއްގެ މީހުން ސައިކަލުތަކުގައި އެތެރެވަރަށް ދާ ތަން ފެނިފައިވެއެވެ. ނަމަވެސް ފަހުން ވަނީ ސުނާމީގެ އިންޒާރު އުވާލާފައެވެ.

ސާޗް އެންޑް ރެސްކިއު ޓީމުތަކުން މިހާރު ދަނީ މައުމޭރޭގައި ގެއްލުންވި އިމާރާތްތަކުގެ ދަށުވެފައިވާ މީހުން ސަލާމަތްކުރުމުގެ މަސައްކަތް ކުރަމުންނެވެ. ނަމަވެސް، އެ ސަރަހައްދަކީ އެކަހެރި އަދި ފަރުބަދަމާފާނު ސަރަހައްދަކަށްވާތީ، ލިބުނު މުޅި ގެއްލުމުގެ ތަފްސީލު ހޯދުމަށް ވަގުތު ނަގާނެ ކަމަށް ބެލެވެއެވެ.

އިންޑޮނޭޝިއާގެ ނޭޝަނަލް ޑިޒާސްޓާ މެނޭޖްމަންޓް އެޖެންސީ (ބީއެންޕީބީ) އިން ފުރަތަމަ ބުނީ ދެ މީހުން މަރުވެފައިވާ ކަމަށެވެ. ނަމަވެސް ފަހުން އެ އެޖެންސީން ވަނީ މަރުވީ އެކަކު ކަމަށާއި، ހަތަރު މީހަކަށް އަނިޔާވި ކަމަށް ކަށަވަރުކޮށްދީފައެވެ. "އޮން-ގްރައުންޑް އޮފިޝަލުން ކަށަވަރުކޮށް މައުލޫމާތު ސާފުކުރުމަށްފަހު، މަރުވި މީހުންގެ އަދަދު ވަނީ އެކަކަށް ރިވައިޒް ކުރެވިފައި،" ބީއެންޕީބީގެ ބަޔާނުގައިވެއެވެ.

އިންޑޮނޭޝިއާގެ މީޓިއޮރޮލޮޖީ، ކްލައިމަޓޮލޮޖީ އެންޑް ޖިއޯފިޒިކްސް އެޖެންސީން ބުނި ގޮތުގައި، މި ބިންހެލުން އައިސްފައިވަނީ އީސްޓް ނުސާ ތެންގާރާގެ ފްލޯރެސް ސަރަހައްދަށް، އެގައުމުގެ ގަޑިން ހެނދުނު 05:00 ޖެހުމުގެ ކުޑަ އިރުކޮޅެއް ކުރިންނެވެ. މި ބިންހެލުން އައިސްފައިވަނީ 15 ކިލޯމީޓަރު އަޑިންނެވެ. ބިންހެލުމަށްފަހު ބާރުގަދަ ލޮޅުންތަކެއް (އާފްޓާޝޮކް) އައިސްފައިވާއިރު، އޭގެ ތެރޭގައި 6.1 މެގްނިޓިއުޑްގެ ލޮޅުމެއްވެސް ހިމެނެއެވެ.

ބީއެންޕީބީން ވަނީ އާންމުން ހަމަޖެހިގެން ތިބުމަށާއި އައްސޭރިފަށުގެ ސަރަހައްދުތަކާ ދުރުގައި ތިބުމަށް އިލްތިމާސްކޮށްފައެވެ. "އާންމުން އިމާރާތްތަކަށް، ހާއްސަކޮށް ރެނދުލާފައިވާ ނުވަތަ އޮގަނައިޒޭޝަނަލް ގެއްލުން ލިބިފައިވާ އިމާރާތްތަކަށް ވަނުމުން ދުރުހެލިވާންޖެހޭ،" ބީއެންޕީބީން ބުންޏެވެ. އަދި ގެއްލުންތަކުގެ މައުލޫމާތު ސާފުކުރުމަށް އަވަސް އެސެސްމަންޓެއް ހަދަމުންދާ ކަމަށްވެސް އެޖެންސީން ބުންޏެވެ.

އީސްޓް ނުސާ ތެންގާރާގެ ސިއްކާގެ ތަލިބޫރާ އަވަށުގައި ދިރިއުޅޭ އާނޯލްޑް ވެލިއަންޓޯ ބީބީސީއަށް ދިން އިންޓަވިއުއެއްގައި ބުނީ ބިންހެލުން އައިއިރު އޭނާ އޮތީ ނިދާފައި ކަމަށާއި، ތަން މާބޮޑަށް ގުޑެން ފެށުމުން ހޭލެވުނު ކަމަށެވެ. އަދި އޭނާގެ ދަރިފުޅު ގޮވައިގެން ބޭރަށް ނުކުތްއިރު، އައްސޭރިފަށާ ކައިރީގައި ތިބި ގިނަ މީހުން ގެތައް ދޫކޮށް ފަރުބަދަތަކާ ދިމާލަށް ގޮސްފައިވާ ކަމަށާއި، ކަނޑުގެ ފެންގަނޑު ވަރަށް ބޮޑަށް ހިނދިފައިވާތީ މީހުން ބިރުން އުޅުނު ކަމަށް އޭނާ މައުލޫމާތު ދިނެވެ.