ބަންގްލަދޭޝްގެ ވެރިރަށް ޑާކާގެ ހަޒްރަތު ޝާހްޖަލާލް އިންޓަނޭޝަނަލް އެއާޕޯޓްގައި އަލިފާނެއް ރޯވެ، އެއަރޕޯޓުގެ ހުރިހާ ފްލައިޓްތަކާއި ލޭންޑިންގ އޮޕަރޭޝަންތައް ހުއްޓާލައިފިއެވެ.

ހޮނިހިރު ދުވަހު ހިނގި މި ހާދިސާގައި ފުރަތަމަ ރޯވެފައި ވަނީ އެއާޕޯޓްގެ ކާގޯ ސެކްޝަނުގައެވެ.

Ad by Hajj Corporation

އެއަރޕޯޓާއި ފަޔަރ ސަރވިސްގެ އޮފިޝަލުން މަޢުލޫމާތު ދޭގޮތުގައި، އިމްޕޯޓް ކުރެވޭ މުދާ ގިނައިން ރައްކާކުރެވިފައި ހުންނަ ކާގޯ ސެކްޝަނުގައި ވަރަށް ބޮޑަށް ރޯވެ ދުން އުފެދިފައިވެއެވެ.

އަލިފާން ނިއްވުމުގެ މަސައްކަތުގައި 36 ޔުނިޓްގެ ފަޔަރ ފައިޓަރުން ބައިވެރިވެފައިވާއިރު، އިތުރު 5 ޔުނިޓް އެ މަސައްކަތުގައި ބައިވެރިވުމަށް ދަތުރުކުރަމުންދާކަމަށް ފަޔަރ ސަރވިސްގެ މީޑިއާ ސެލުން ބުނެފައިވެއެވެ.

މި ހާދިސާއާ ގުޅިގެން ބަންގްލަދޭޝްގެ އާމީއާއި، އެއަރ ފޯސް އަދި ނޭވީގެ އިތުރުން ބޯޑަރ ގާޑުގެ ދެ ޕްލެޓޫނެއްވެސް އަލިފާން ނިއްވުމުގެ މަސައްކަތުގައި ބައިވެރިވެފައިވެއެވެ.

ލޯކަލް ޓީވީ ރިޕޯޓުތަކުން ބުނާގޮތުގައި، ފަޔަރ ފައިޓަރުންނާއެކު އެހެން ބައެއް މީހުންވެސް މި މަސައްކަތުގައި ބައިވެރިވުމުގެ ތެރޭގައި ޒަޚަމްވެފައިވާކަމަށް ބުނެފައިވެއެވެ. ނަމަވެސް އަލިފާން ރޯވި ސަބަބާއި ޒަޚަމްވި މީހުންގެ އަދަދާ ބެހޭ އިތުރު ތަފްޞީލުތައް އަދި ހާމަކޮށްފައެއް ނުވެއެވެ.