މި ސަރުކާރު ފެށުނީއްސުރެ މިހާތަނަށް އިސްލާމީކަންތައްތަކާ ބެހޭ ވުޒާރާއިން އެކި މަޝްރޫޢުތަކަށް 170 މިލިއަނަށްވުރެ ގިނަ ރުފިޔާ ކުންފުނިތަކަށް ދައްކާފައިވާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.

ވަޒީރު ޝަހީމް މިހެން ވިދާޅުވީ ކެންދޫގައި ތަރައްގީ ކުރާ މިސްކިތާ ގުޅޭގޮތުން އެ ދާއިރާގެ މެމްބަރު މައުރޫފު ޒާކިރު ކުރެއްވި ސުވާލަށް ޖަވާބުދެއްވަމުންނެވެ.މީގެ އިތުރުން ވަޒީރުގެ ވާހަކަފުޅުގައި ވަނީ ފާއިތުވެދިޔަ ސަރުކާރު ނިމިގެންދިޔައިރު އެކި ކުންފުނިތަކަށް ދައްކަން ޖެހޭ ގިނަ އަދަދެއްގެ ފައިސާ ނުދައްކާ އޮތްކަން ފާހަގަކުރައްވާފައެވެ.

Ad by Hajj Corporation

އަދި ވަޒީރުގެ ވާހަކަފުޅުގައި އިތުރަށް ވިދާޅުވީ، މި ސަރުކާރުން މިހާރު ޢިމާރާތް ކުރަމުންދާ މިސްކިތްތަކާއި އިސްލާމީ މަރުކަޒުތަކުގައި ރަނގަޅު ވަސީލަތްތައް ޤާއިމް ކުރުމަކީ އަމާޒެއްކަމަށާއި އެގޮތުން ހއ. ދިއްދޫގައި މިހާރު މަސައްކަތް ނިމިފައިވާ އިސްލާމީ މަރުކަޒުގެ ހުޅުވޭއިރު އެ މަރުކަޒު ހުޅުވިގެންދާނީ ކީރިތި ޤުރުއާނާއި ބެހޭ މަރުކަޒުގެ ގޮތްޕެއްގެ ގޮތުގައިިކަމަށާއި ހުރިހާ ވަސީލަތެއް ޤާއިމް ކުރެވި ލައިބްރަރީވެސް ޤާއިމްކުރެވިގެންދާނެކަމަށް ވަޒީރު ފާހަގަކުރެއްވިއެވެ. ވަޒީރު ވިދާޅުވީ، އަމާޒަކީ މިސްކިތްތަކާއި މަރުކަޒުތަކަކަކީ ޢިލްމީ އަދި އިޖުތިމާޢީ ފައިދާތައް މުޖުތަމަޢުތަކަށް ކުރާނެ ތަންތަނަށް ހެދުންކަމަށެވެ.

ވަޒީރުގެ ވާހަކަފުޅުގައި ވަނީ ރާއްޖޭގެ އެކިކަންކޮޅުތަކުގައި ކީރިތި ޤުރުއާނުގެ ޢިލްމު ފެތުރުއްވުމަށް މި ސަރުކާރުން ކުރައްވަމުންދާ މަސައްކަތްތަކަށްވެސް އަލިއަޅުއްވާލައްވާފައެވެ. އެގޮތުން މި ސަރުކާރުން މުޅި ރާއްޖޭގައި ކީރިތި ޤުރުއާނުގެ ޢިލްމު ފެތުރުއްވުމަށް ގިނަގުނަ މަަސައްކަތްތަކެއް ކުރަމުން ގެންދާކަން ފާހަގަކުރައްވާ ވަޒީރު ވިދާޅުވީ، ރާއްޖޭގެ ހުރިހާ ރަށެއްގައި ކީރިތި ޤުރުއާނާއި ބެހޭ މަރުކަޒުގެ ގޮފިތައް ޤާއިމް ކުރުމަކީ ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު މިހާރު އިޢުލާން ކުރައްވާފައިވާ ސިޔާސަތެއްކަމަށާއި މިއާއެކު ކީރިތި ޤުރުއާނުގެ ޢިލްމު ފެތުރުން އިތުރު ހަރުފަތަކަށް ގެންދެވޭނެކަމަށެވެ.

މިސްކިތްތަކުގެ މަޝްރޫޢުތަކާއި ގުޅޭ ގޮތުން މިއަދު ރައްޔިތުންގެ މަޖިލީހުގެ ޖަލްސާގައި ވަޒީރަށް ރައްޔިތުންގެ މަޖިލީހުގެ ޢިއްޒަތްތެރި މެމްބަރު ކުރެއްވި ގިނަ ސުވާލުތަކަށް ވަޒީރު ވަނީ ތަފްސީލީ ޖަވާބުތަކެއް ދެއްވައިފައެވެ.

އެގޮތުން ވަޒީރުގެ ވާހަކަފުޅުގައި ވަނީ އެކި މަޝްރޫޢުތަކުގެ ތަފްސީލް ދެއްވާފައެވެ. އަދި ބައެއް މަސައްކަތްތައް ނުނިމި ލަސްވާ ސަބަބުތަކާއި މަސައްކަތްތައް ކުރިއަށް ގެންދިއުމަށް ވުޒާރާއިން ކުރަމުންދާ މަސައްކަތްތަކުގެ މަޢުލޫމާތު ވެސް ވަޒީރު ވަނީ ޙިއްސާ ކުރައްވާފައެވެ.