ބެންކޮކް (19 އޮކްޓޯބަރު): ތައިލެންޑްގެ ކުރީގެ ރާނީ ސިރިކިތް 93 އަހަރުފުޅުގެ އުމުރުފުޅުގައި އަވަހާރަވެއްޖެކަމަށް ތައިލެންޑްގެ ރަސްގެފާނުގެ އޮފީހުން ހޮނިހިރު ދުވަހު އިޢުލާނުކޮށްފިއެވެ.

ރަސްގެފާނުގެ އޮފީހުން ޢާންމުކުރި ބަޔާނެއްގައިވާ ގޮތުން، ރާނީ ސިރިކިތް އަވަހާރަވީ ހުކުރު ދުވަހުގެ ރޭގަނޑުއެވެ. 2012 ވަނަ އަހަރު ސްޓްރޯކްއެއް ޖެހުމާ ގުޅިގެން ރާނީ ސިރިކިތް ވަނީ ޢާންމު ދިރިއުޅުމުން މުޅިން ދުރުވެވަޑައިގެންފައެވެ. ރަސްގެފާނުގެ އޮފީހުން ބުނެފައިވާ ގޮތުގައި 2019 ވަނަ އަހަރުން ފެށިގެން އެކި ބަލިތަކާ ގުޅިގެން ހޮސްޕިޓަލްގައި އެނދުމަތިވެވަޑައިގެން އޮންނަވަނިކޮށް، 17 އޮކްޓޯބަރުގައި ލޭގެ ތެރެއަށް އިންފެކްޝަނެއް ވަދެ، ބަލިފުޅު ވަރަށް ބޮޑުވެފައިވަނިކޮށެވެ.

Ad by Hajj Corporation

މިކަމާއި ގުޅިގެން ރަސްގެފާނުގެ ޢާއިލާއާއި ރަސްގެފާނުގެ އޮފީހުގެ މުވައްޒަފުންނަށް އެއް އަހަރު ދުވަހުގެ ހިތާމައިގެ މުއްދަތެއް ވަނީ އިޢުލާނުކޮށްފައެވެ.

ތައިލެންޑްގެ ބޮޑުވަޒީރު އަނުތިން ޗަންވިރަކުލް ވަނީ މެލޭޝިއާގައި ބޭއްވުމަށް ހަމަޖެހިފައިވާ އާސިއާން ސަމިޓަށް ދިއުން ކުރީގެ ރާނީގެ އަވަހާރަވުމާ ގުޅިގެން ކެންސަލްކުރައްވާފައިކަމަށް ސަރުކާރުގެ ތަރުޖަމާނަކު ބުނެފައިވެއެވެ. އަދި ރަސްމީ ޖަނާޒާއާ ގުޅޭ ގޮތުން މަޝްވަރާކުރުމަށް ހޮނިހިރު ދުވަހު ކެބިނެޓް ބައްދަލުވުމެއް ބޭއްވުމަށް ވަނީ ހަމަޖެހިފައެވެ.

ތައިލެންޑްގެ ގިނަ ތައި ރައްޔިތުންނަށް ކުރީގެ ރާނީ ސިރިކިތް ހަނދާނަށް ގެންނަނީ އެކަމަނާގެ ހެޔޮއެދިވަޑައިގަތުމާއި އެހީތެރިކަމުގެ މަސައްކަތްޕުޅުތަކާއި، މައިންގެ ހެޔޮ ސިފަތަކުގެ ނަމޫނާއެއްގެ ގޮތުގައިަކަމަށް ތައި މީޑިއާއިން ސިފަކޮށްފައިވެއެވެ.

އެކަމަނާގެ އަވަހާރަވުމާ ގުޅިގެން ތައިލެންޑްގައި ވަރަށް ބޮޑު އިޙްތިރާމާއެކު ޢަމަލުކުރެވޭނެއެވެ. އެއީ ރަސްކަމުގެ ނިޒާމާ ދެކޮޅަށް ވާހަކަދެއްކުމަކީ ޤާނޫނީ ގޮތުން މަނާކަމަކަށްވެފައި، އެފަދަ ކަމެއް ކޮށްފިނަމަ ޖަލަށްލުމުގެ އަދަބު ކަނޑައެޅިފައިވާތީއެވެ. މި ޤާނޫނުގެ ދަށުން އަވަހާރަވެފައިވާ ރަސްކަލުންނާ ދެކޮޅަށްވެސް ވާހަކަދެއްކުމަކީ މަނާކަމެކެވެ.