އިޓަލީގެ ޔޫރަޕިއަން ޕާލަމެންޓްގެ މެންބަރު ލޫޗިއާ އަނުންޒިއާޓާ، އަންނަ ހަފްތާގައި އިސްރާއީލަށް ކުރެއްވުމަށް ހަމަޖެހިފައިވާ ދަތުރު ކެންސަލްކުރައްވައިފިއެވެ.

މި ނިންމުން ނިންމަވާފައި ވަނީ ސްރާއީލުގެ ޕާލަމެންޓުން ވެސްޓް ބޭންކް އެނެކްސްކުރުމަށް ފާސްކުރި ޤާނޫނާ ގުޅިގެންނެވެ.

Ad by Hajj Corporation

"ކެނެސެޓްގެ ދަޢުވަތަކަށް ޔޫރަޕިއަން ޕާލަމެންޓްގެ ވަފުދެއް އަންނަ ހަފްތާ އިސްރާއީލަށް ކުރުމަށް ހަމަޖެހިފައިވާ ދަތުރުގައި ބައިވެރިނުވުމަށް އަހަރެން ނިންމައިފިން،" އަނުންޒިއާޓާ ވިދާޅުވިއެވެ.

އޭނާ މި ދަޢުވަތު ދެކޮޅު ހެއްދެވި ސަބަބު ބަޔާންކުރައްވަމުން ވިދާޅުވީ، ވެސްޓް ބޭންކް އެނެކްސްކުރުމުގެ ޤާނޫނު ފާސްކުރުމާއި އދ. އަށް އަމާޒުކޮށް ހިންގާ ހަމަލާތަކުން ދައްކުވައިދެނީ އިސްރާއީލުގެ ޕާލަމެންޓް ސުލްހައާ ބެހޭގޮތުން ވާހަކަދައްކަން ތައްޔާރަށް ނެތްކަމެވެ. މި ނިންމުން ނިންމީ ޤައުމީ ފެންވަރުގައި ޑިމޮކްރެޓިކް ޕާޓީއާ އެއްބަސްވެގެންކަމަށްވެސް އޭނާ ވިދާޅުވިއެވެ.

މިދިޔަ ބުދަ ދުވަހު އިސްރާއީލުގެ ޕާލަމެންޓުން ވަނީ ވެސްޓް ބޭންކް އެނެކްސްކުރުމަށާއި ޖެރޫސަލަމްގެ އިރުމަތީގައިވާ ފަލަސްތީނުގެ ބިމުގައި ޤާއިމުކޮށްފައިވާ މައާލެ އަދުމިމް އާބާދީ އެނެކްސްކުރުމަށް ދެ ބިލެއް ފުރަތަމަ ކިޔުމަށް ފާސްކޮށްފައެވެ. މި ބިލުތައް ޤާނޫނަކަށް ވުމަށް އިތުރު ތިން ކިޔުން ކިޔަންޖެހެއެވެ.

ބައިނަލްއަޤްވާމީ ތަފާތު ފަރާތްތަކުން ބުނާ ގޮތުގައި، މި ޤާނޫނުތައް ތަންފީޒުކޮށްފިނަމަ، އދ. ގެ ޤަރާރުތަކުގައި ވިސްނާފައިވާ ދެ ދައުލަތުގެ ހައްލު ތަންފީޒުކުރުމުގެ އެއްވެސް ފުރުސަތެއް ނޯންނާނެއެވެ. މިކަމާ ގުޅިގެން ތުރުކީ ހިމެނޭ 15 ޤައުމަކާއި އަރަބު ލީގާއި އިސްލާމިކް ކޯޕަރޭޝަން އޮގަނައިޒޭޝަނުން އެކުގައި ނެރުނު ބަޔާނެއްގައި ވަނީ ވެސްޓް ބޭންކުގައި "އިސްރާއީލުގެ ސިޔާދަތު" ތަންފީޒުކުރުމަށް ފާސްކުރި ބިލުތަކާމެދު ކުށްވެރިކޮށްފައެވެ.

މިދިޔަ އަހަރުގެ ޖުލައި މަހު އިންޓަނޭޝަނަލް ކޯޓް އޮފް ޖަސްޓިސް (ICJ) އިން ނެރުނު އާދަޔާ ޚިލާފު ރައުޔެއްގައި ވަނީ އިސްރާއީލުން ފަލަސްތީނުގެ ސަރަހައްދުތައް އޮކިއުޕައިކޮށްފައި ބޭތިއްބުމަކީ ޣައިރު ޤާނޫނީ ކަމެއްކަމަށް ކަނޑައަޅައި، ވެސްޓް ބޭންކާއި އިރުމަތީ ޖެރޫސަލަމްގައި ޤާއިމުކޮށްފައިވާ ހުރިހާ އާބާދީތަކެއް އުވާލުމަށް ގޮވާލާފައެވެ.