ޖަޕާނުގެ ތާރީޚުގައި ފުރަތަމަ ފަހަރަށް އަންހެން ބޮޑުވަޒީރެއްގެ ގޮތުގައި ލިބަރަލް ޑިމޮކްރެޓިކް ޕާޓީ (އެލްޑީޕީ) ގެ ރައީސާ ސަނާއެ ތަކައިޗީ އިންތިޚާބުވެއްޖެއެވެ.

މިއީ އެ ޤައުމުގެ ޤާނޫނުއަސާސީގެ ތާރީޚުގައި މި މަޤާމަށް އައްޔަންކުރެވުނު ފުރަތަމަ އަންހެން ބޭފުޅާއެވެ.

Ad by Hajj Corporation

އޮކްޓޯބަރު 21 ވަނަ ދުވަހުގެ މެންދުރުފަހު، ޖަޕާނުގެ ޑައިޓްގެ މަޖިލީހުގެ ދަށު ގޭގައި ބޭއްވުނު ވޯޓުލުމުގައި، ސަނާއެ ތަކައިޗީ ޖަޕާނުގެ 104 ވަނަ ބޮޑުވަޒީރުކަމަށް ހޮވިވަޑައިގަތެވެ. މަޖިލީހުގެ ދަށު ގެއިން ތަކައިޗީއަށް 237 ވޯޓު ލިބިވަޑައިގަތެވެ. މިއީ ފުރަތަމަ ބުރުގައި ކާމިޔާބުކުރުމަށް ބޭނުންވާ 233 ވޯޓަށްވުރެ އިތުރު އަދަދެކެވެ.

މަޖިލީހުގެ މަތީގޭގައި ބޭއްވުނު ވޯޓުލުމުގެ ފުރަތަމަ ބުރުގައި ތަކައިޗީއަށް 123 ވޯޓު ލިބިވަޑައިގަތެވެ. މިއީ ކާމިޔާބުކުރުމަށް ބޭނުންވާ އަދަދަށްވުރެ އެއް ވޯޓު މަދު އަދަދެކެވެ. އެހެންކަމުން ދެވަނަ ބުރެއް ބޭއްވުނެވެ. ދެވަނަ ބުރުގައި ތަކައިޗީއަށް 125 ވޯޓު ލިބި، އިދިކޮޅު ކެންޑިޑޭޓް ޔޮޝިހިކޯ ނޯދާގެ 46 ވޯޓަށްވުރެ އިތުރުވެ، މަތީ މަޖިލީހުންވެސް އިންތިޚާބު ކާމިޔާބުކުރެއްވިއެވެ.

މި އިންތިޚާބާއެކު ޖަޕާނުގެ ސިޔާސީ މައިދާނަށް ވަނީ އައު ޞަފްޙާއެއް އިތުރުވެފައެވެ. ޖަޕާނުގެ ފަދަ ޤައުމެއްގައި އަންހެން ބޭފުޅަކު ބޮޑުވަޒީރުކަމުގެ މަޤާމަށް އިންތިޚާބުވުމަކީ ވަރަށް މުހިންމު ކުރިއެރުމެއް ކަމުގައި ސިޔާސީ މާހިރުން ފާހަގަކުރެއެވެ.