ރެއާލް މެޑްރިޑްގެ ކެޕްޓަން އަދި ޑިފެންޑަރ ޑެނީ ކާވަހާލްއަށް ސީރިއަސް އަނިޔާއެއް ލިބި، ދިގު މުއްދަތަކަށް ކުޅުމާ ދުރުގައި ހުންނަން ޖެހިއްޖެކަން އެ ކްލަބުން ވަނީ ކަށަވަރުކޮށްދީފައެވެ. މި އަނިޔާއާ ގުޅިގެން ކާވަހާލް މަދުވެގެން ދެ މަސް ދުވަހު، އަދި އެންމެ ގިނަވެގެން ތިން މަސް ދުވަހު ކުޅުމާ ދުރުގައި ހުންނަން ޖެހިދާނެ ކަމަށް ރިޕޯޓުތައް ބުނެއެވެ.

ރެއާލް މެޑްރިޑުން ހެދި ޓެސްޓުތަކަށް ފަހު ނެރުނު ބަޔާނެއްގައި ބުނެފައިވަނީ، އޭނާގެ ކަނާތު ކަކުލުގައި "ޖޮއިންޓް ފްރީ ބޮޑީއެއް" ހުރިކަން ދެނެގަނެވިފައިވާ ކަމަށެވެ. މި މައްސަލަ ހައްލުކުރުމަށްޓަކައި ކާވައްޔާލްއަށް އާރތޮސްކޮޕީ (އޮޕަރޭޝަން) ހަދަން ޖެހޭނެ ކަމަށް ވެސް އެ ބަޔާނުގައިވެއެވެ. އާރތޮސްކޮޕީއަކީ ކަކުލުގެ ތެރެއަށް ކުޑަ ކެމެރާއެއް ލައްވައިގެން ހަދާ އޮޕަރޭޝަނެކެވެ.

Ad by Hajj Corporation

ކާވައްޔާލްއަށް 2-3 މަސް ދުވަހުގެ މުއްދަތަކަށް ކުޅުމާ ދުރުގައި ހުންނަން ޖެހުމަކީ، ރެއާލް މެޑްރިޑްއަށް ލިބުނު ބޮޑު ގެއްލުމެކެވެ. މި ދިގު މުއްދަތުގައި ރެއާލް މެޑްރިޑުން ބަރޯސާވާން ޖެހޭނީ އަނިޔާއަކަށް ފަހު އަލަށް އެނބުރި އައިސްފައިވާ ޓްރެންޓް އެލެކްސެންޑަރ-އާނަލްޑްއަށާއި، މި ފަހުން ރައިޓް-ބެކްގެ މަގާމުގައި ކުޅެމުންދާ ފެޑޭ ވަލްވާޑޭއަށެވެ. ކާވައްޔާލްގެ ހުސްކަން ފޫބައްދަން މި ދެ ކުޅުންތެރިންނަށް ބޮޑު ޒިންމާއެއް އުފުލަން ޖެހޭނެއެވެ.