ޔުއެފާ ޗެމްޕިއަންސް ލީގުގައި ރޭ ކުޅުނު މުހިންމު މެޗުގައި ރެއާލް މެޑްރިޑުން ޔުވެންޓަސް 1-0 އިން ބަލިކޮށްފިއެވެ. މި ކާމިޔާބީއާއެކު ރެއާލް މެޑްރިޑް މި ސީޒަނުގައި ޗެމްޕިއަންސް ލީގުގައި ކުޅުނު ތިން މެޗުންވެސް މޮޅުވެ ޖުމްލަ ނުވަ ޕޮއިންޓާއެކު %100 ގެ ރެކޯޑެއް ދަމަހައްޓާފައިވެއެވެ. މެޗުގެ ހަމައެކަނި ލަނޑު ކާމިޔާބުކުރީ ޖޫޑް ބެލިންހަމް އެވެ.

ރެއާލްގެ ދަނޑުގައި 76 ހާހަށްވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެން ދިޔައިރު، ގޯލެއް ފެނިފައެއް ނުވެއެވެ. ނަމަވެސް ޔުވެންޓަސްއިން ވަނީ ރެއާލް މެޑްރިޑްގެ ގޯލަށް ނުރައްކާތެރި ދެ ހަމަލައެއް ފޮނުވާލާފައެވެ. އެ ހަމަލާތައް ރެއާލް މެޑްރިޑްގެ ގޯލުކީޕަރު ކޯޓުއާ ވަނީ ހުއްޓުވާފައެވެ.

Ad by Hajj Corporation

ރެއާލް މެޑްރިޑްގެ ހަމައެކަނި ލަނޑު ކާމިޔާބުކޮށްދިނީ މެޗުގެ ދެވަނަ ހާފުގެ ކުޅުން ފެށުނުތާ 12 ވަނަ މިނިޓުގައި ޖޫޑް ބެލިންހަމްއެވެ. އަނިޔާގެ ސަބަބުން ކުޅުމާއި ދުރުގައި ހުރުމަށްފަހު އަލުން ކުޅުމުގެ ތެރެއަށް އައިސް އާދަޔާ ޚިލާފު މޮޅު ފޯމެއްގައި ހުރި ބެލިންހަމް ދަނީ ޓީމަށް ނަތީޖާ ނެރެދިނުމުގައި މުހިންމު ދައުރެއް އަދާކުރަމުންނެވެ. މި ލަނޑަށްފަހުވެސް ރެއާލް މެޑްރިޑަށް ވަނީ އިތުރު ގޯލު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ރެއާލް މެޑްރިޑަށް ވަނީ މި ސީޒަނުގެ ޗެމްޕިއަންސް ލީގު ތާވަލުގެ ފަސްވަނަ މަގާމް ލިބިފަ އެވެ. އެއްވަނައިގައި އޮތް ޕީއެސްޖީ އަށްވެސް 9 ޕޮއިންޓް ލިބިފައިވާއިރު، އެ ޓީމަށް ކުރި ލިބެނީ ފައިދާ ގޯލުގެ ތަފާތުންނެވެ.

އަނެއްކޮޅުން ޔުވެންޓަސްއަށް މުބާރާތުގައި މިއަދާއި ހަމައަށް އެކަށީގެންވާ ކާމިޔާބީއެއް ލިބިފައެއް ނުވެއެވެ. މިހާތަނަށް ކުޅުނު ތިން މެޗުގެ ތެރެއިން ދެ މެޗު އެއްވަރުވެ، އެއް މެޗުން ބަލިވެ ތިން މެޗުން ޖުމްލަ 2 ޕޮއިންޓާއެކު އެ ޓީމު އޮތީ ތާވަލުގެ 25 ވަނައިގައެވެ.