ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފްގެ ދަޢުވަތަކަށް ރާއްޖެ ވަޑައިގެން އުޅުއްވާ ޗައިނާގެ ޕްރޮސެކިއުޓޯރިއަލް ވަފުދާއި، ޕީޖީ އޮފީހުގެ ވަފުދަކާ ދެމެދު، މުހިންމު މަޝްވަރާތަކެއް ކުރިއަށް ގެންގޮއްސިއެވެ.

ޗައިނާގެ ވަފުދުގައި އިސްކޮށް ބައިވެރިވެވަޑައިގަންނެވީ ޗައިނާގެ ސުޕްރީމް ޕީޕަލްސް ޕްރޮސެކިއުޓޮރޭޓްގެ ދާއިމީ ޕްރޮސެކިއުރަޓޯރިއަލް ކޮމިޓީގެ މެންބަރު ޝީ ވެއިޖޮންގް ކަމަށާއި، އެއީ ޗައިނާގެ ވައިސް މިނިސްޓަރ ފެންވަރުގެ ބޭފުޅެއް ކަމަށް ޕީޖީ އޮފީހުން މައުލޫމާތުދީފައި ވެއެވެ. އެމަނިކުފާނުގެ އިތުރުން މި ވަފުދުގައި ޗައިނާގެ އެކި ސްޓޭޓްތަކުގެ ޑެޕިއުޓީ ޗީފް ޕްރޮސެކިއުޓަރުންނާއި، އިސް ވެރިން ބައިވެރިވެޑައިގެންފައިވެއެވެ. އަދި ޗައިނާ ސަރުކާރުން ރާއްޖެއަށް ކަނޑައަޅުއްވާފައިވާ ސަފީރު ކޮންގް ޝިއަންހުއާވެސް މިވަފުދުގައި ބައިވެރިވެވަޑައިގެންފައިވެއެވެ. 

Ad by Hajj Corporation

ހޮޓެލް ޖެންގެ ބޯލް ރޫމްގައި ކުރިއަށްގެންދިޔަ މި މަޝްވަރާގައި ޕްރޮސިކިއުޓަރ ޖެނެރަލް ވަނީ ޗައިނާގެ ވަފުދަށް ވަރަށް ހޫނު މަރުޙަބާއެއް ދަންނަވާ، އެމަނިކުފާނުގެ ދަޢުވަތު ޤަބޫލުކުރައްވާ ރާއްޖެ ވަޑައިގެންނެވިކަމަށްޓަކައި ދިވެހި ދައުލަތުގެ ފަރާތުން ޝުކުރު އަދާކުރައްވާފައެވެ. އަދި ދިވެހިރާއްޖެއާއި ޗައިނާއާ ދެމެދު އޮތް ޒަމާންވީ އެކުވެރި ގުޅުން، ދެ ޤައުމުގެ ޕްރޮސިކިއުޝަން އިދާރާތަކުގެ މެދުގައިވެސް ޤާއިމުކުރުމުގެ މުހިންމުކަން އެމަނިކުފާނު ފާހަގަކުރައްވާފައިވެއެވެ.

މި ބައްދަލުވުމުގައި ރާއްޖޭގެ ޕްރޮސްކިއުޓަރުން އިތުރަށް ތަމްރީނުކުރުމާއި، ޕީޖީ އޮފީހުގެ އުމްރާނީ ވަސީލަތްތައް ތަރައްގީކުރުމާ ގުޅޭގޮތުން ދެގައުމުގެ ވަފުދުގެމެދުގައި މަޝްވަރާކޮށްފައިވެއެވެ.

ދިވެހިރާއްޖޭގެ އުއްތަމަ ފަނޑިޔާރު އޮނަރަބަލް އަލްއުސްތާޛް ޢަބްދުލްޣަނީ މުޙައްމަދާއި، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލިޖީ ޢަލީ އިޙްސާންއާއި، ކޮމިޝަނަރ އޮފް ޕޮލިސް އިސްމާޢީލް ނަވީންއާވެސް ޗައިނާ ވަފުދުގެ ބޭފުޅުން ބައްދަލުކުރައްވާފައިވެއެވެ.

މި ދަތުރުފުޅަކީ ޗައިނާގެ ޕަބްލިކް ޕްރޮސިކިއުޝަން މަސައްކަތްކުރައްވާ އިދާރާގެ ވެރިން ރާއްޖެއަށް ކުރެއްވި ރަސްމީ ފުރަތަމަ ދަތުރުފުޅުކަމުން، މިއީ ތާރީޚީ ދަތުރުފުޅެއްކަން ޕީޖީ އޮފީހުން ފާހަގަކުރެއެވެ.