ކުރީ ސަރުކާރުގެ ބިންވެރިޔާ އަދި ގެދޮރުވެރިޔާ ސްކީމްގެ ދަށުން ދޫކުރާ ފުލެޓުތަކާއި ގޯތިތައް ދޫކުރުން ލަސްވާތީ އިދިކޮޅު އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހެޅި ގަރާރު މިއަދު މަޖިލީހުގެ ތަޅުމުން ބަލައިނުގަނެ ބޭރުކޮށްލައިފިއެވެ.

އެމްޑީޕީގެ ފަރާތުން ކެންދޫ ދާއިރާގެ މެންބަރު، މައުރޫފް ޒާކިރު ހުށަހެޅުއްވި އެ ގަރާރު ބަލައިގަތުމަށް ނެގި ވޯޓުގައި ފެންނަ ކަމަށް ވޯޓު ދެއްވީ އެންމެ 11 މެންބަރުންނެވެ. ގަރާރު ބޭރުކޮށްލަން 40 މެންބަރަކު ވޯޓު ދެއްވިއެއެވެ.

Ad by Hajj Corporation

މައުރޫފް ހުށަހެޅުއްވި ގަރާރުގައި މައިގަނޑުގޮތެއްގައި ހިމަނާފައިވާ ކަންބޮޑުވުންތަކުގެ ތެރޭގައި ،4000 ފުލެޓުގެ ހައްގުވެރިންނަށް ފުލެޓު ހަވާލުކުރުމުގައި ސަރުކާރުން އިހުމާލުވެފައިވުމާއި، ގުޅީފަޅު، ހުޅުމާލެ ފޭސް ތިނެއް އަދި ގިރާވަރުފަޅު ހަވާލުނުކޮށް ލަސްކުރަމުންދާ ދިޔުން އަދި އުތުރުތިލަފަޅުން ގޯއްޗާއި ހުޅުމާލެއިން ފުލެޓަށް އެދި ހުށަހަޅާފައިވާ ފޯމު އިވެލުއޭޓްނުކޮށް ލަސްކުރަމުންދާ ދިޔުން ހިމެނެއެވެ.

މި ޤަރާރަށް ބަހުސް ކުރައްވާ އިނގުރައިދޫ ދާއިރާގެ މެންބަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު، އިބްރާހިމް ފަލާހް ވަނީ،ގެދޮރުވެރިޔާ އަދި ބިންވެރިޔާ މަޝްރޫއުގެ ދަށުން ދޫކުރާ ފުލެޓުތަކާއި ބިންތަށް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައި ގެންނެވި ގޮތަށް ކުރާނެ ކަމުގެ ފުރިހަމަ ޔަޤީންކަން އޮތްކަމަށް އިއްޔެގެ މަޖިލީހުގެ ޖަލްސާގައި ވިދާޅުވެފައެވެ.