ރާއްޖޭގެ ރިސޯޓުތަކަށް އަންނަ ފަތުރުވެރިއެއްގެ ބޮލަކަށް، 500 ޑޮލަރު ބޭންކަށް މާރުކުރަން ޖެހޭ ގޮތަށް، ބޭރު ފައިސާއާ ބެހޭ ގަވާއިދެއް އެކުލަވަލައިފިއެވެ.

ރޭ ގެޒެޓުކުރި އެ ގަވާއިދުގެ ދަށުން، ދެ ކެޓަގަރީގެ ވިޔަފާރިއަކަށް ވަނީ ޑޮލަރު ބޭންކަށް މާރުކުރަން މަޖުބޫރުކޮށްފައެވެ. އޭގެ ތެރޭގައި ހިމެނޭ ކެޓަގަރީ އޭގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނުން ކޮންމެ މަހެއްގެ ތެރޭގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެމަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު އެ މަހަށްފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ބޭންކަށް މާރުކުރަން ޖެހެއެވެ.

އެ ކެޓަގަރީގައި ހިމެނެނީ ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ރާއްޖޭގައި ހިންގާ ޓޫރިސްޓު ރިސޯޓުތަކާއި އިންޓަގްރޭޓެޑް ޓޫރިސްޓު ރިޒޯޓުތަކާއި ރިޒޯޓު ހޮޓާތަކެވެ.

އަދި ކެޓަގަރީ ބީގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނުން ދައްކަންޖެހޭނީ 25 ޑޮލަރެވެ. އެ ކެޓަގަރީގައި ހިމެނެނީ ޓޫރިސްޓު ގެސްޓްހައުސް ތަކާއި މީހުން ދިރިއުޅޭ ރަށްރަށުގައި ހިންގާ ހޮޓާތަކުގެތެރެއިން 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓްރީކޮށްފައިވާ ތަންތަނެވެ.

އެ ގަވާއިދުގެ ދަށުން އިސްތިސްނާވާ ޙާލަތްތަކެއް ވެސް ވެއެވެ. އޭގެ ތެރޭގައި ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުން ނަމަ މުސާރަ އާއި އިނާޔަތް ބޭރުފައިސާ އިން ދިނުމާއި ބައިނަލް އަގްވާމީ މުއާމަލާތްތަކާއި ޓޫރިސްޓުންނަށް ވިއްކާ މުދަލާއި ޚިދުމަތުގެ އަގު އަދި އެކްސްޕޯޓް ކުރެވޭ މުދަލާއި ޚިދުމަތުގެ އަގު ހިމެނެއެވެ.

މީގެ އިތުރުން، ރާއްޖޭގެ ޓޫރިޒަމުން ލިބޭ ބޭރު ފައިސާ ލޯކަލް ބޭންކުތަކަށް ޖަމާކުރަން ވެސް އެ ގަވާއިދުގެ ދަށުން ވަނީ މަޖުބޫރުކޮށްފައެވެ. އެގޮތުން އެ ގަވާއިދުގައި ވަނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގައި ރަޖިސްޓްރީކޮށްފައިވާ ވިޔަފާރިތައް ހިމެނޭ ގޮތަށް ފަތުރުވެރިކަމުގެ ދާއިރާގައި މިހާރު ހުރި ވިޔަފާރިތަކަށް ރީ ރަޖިސްޓްރީވުމަށް 30 ދުވަހުގެ މުއްދަތެއް ދީފައެވެ. އަދި މީރާގައި ރަޖިސްޓްރީވާ އަލަށް ހިންގާ ވިޔަފާރިތަކަށް މޯލްޑިވްސް މޮނިޓަރީ އޮތޯރިޓީ (އެމްއެމްއޭ) ގައި ރަޖިސްޓްރީވުމަށް 30 ދުވަހުގެ މުއްދަތެއް ވެސް ދީފައިވެއެވެ.

ޓޫރިޒަމް ކުންފުނިތަކުން ދޭ މުދަލާއި ޚިދުމަތުގެ ތަފްސީލް އަންނަ އޮކްޓޯބަރު މަހުގެ 28 ވަނަ ދުވަހުގެ ކުރިން އެމްއެމްއޭއަށް ހުށަހަޅަން ޖެހެއެވެ. މީގެ އިތުރުން ބޭންކުތަކަށް ޖަމާކުރާ ބޭރު ފައިސާގެ އާމްދަނީގެ ތަފްސީލް ބޭންކުތަކުން އަންގާ ގޮތެއްގެ މަތިން ކަމާބެހޭ އެހެން އިދާރާތަކާ ހިއްސާކުރަން ޖެހޭނެ ކަމަށް ވެސް ގަވާއިދުގައި ބުނެފައިވެއެވެ.

އެ ގަވާއިދުގެ ދަށުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް ހުށަހަޅައިގެން، ވަކި ޚާއްސަ ޙާލަތެއްގައި މަދުން ޑޮލަރު މާރުކުރުމުގެ ހުއްދަ ވެސް ދޭނެއެވެ. އެހެން ނަމަވެސް، އެ ހުއްދަ ދެވޭނީ ކަނޑައަޅާފައިވާ މިންވަރަށް ޑޮލަރު މާރުކޮށްގެން، އެ އިދާރާއިން ކަނޑައަޅާފައިވާ އިލްތިޒާމުތަކުގެ ތެރެއިން އެއްވެސް އިލްތިޒާމެއް އަދާކުރަން ޑޮލަރު ނުހުންނާނެ ކަމަށް އެމްއެމްއޭއަށް ގަބޫލުކުރެވޭނެ ނަމައެވެ. އެ އިލްތިޒާމުތަކަކީ:

1. ބޭރު ފައިސާއިން އަދާކުރަންޖެހޭ ޓެކްސް
2. މާލީ އިދާރާއަކަށް ބޭރު ފައިސާއިން އަދާކުރަން ޖެހިފައިވާ ލޯނު
3. ކޯޓު ހުކުމެއްގައި ދެއްކުމަށް ކަނޑައަޅާފައިވާ ބޭރު ފައިސާގެ އިލްތިޒާމުތައް
4. އޮތޯރިޓީން ހުއްދަދޭ އެހެން ވެސް ބޭރު ފައިސާގެ އިލްތިޒާމުތައް

އަދި އެ ގަވާއިދުގެ ދަށުން ކަނޑައަޅާފައިވާ މައްދާތަކާ ޚިލާފުވާނަމަ، 5،000 ރުފިޔާއިން އެއް މިލިއަން ރުފިޔާގެ އަދަދަކުން ޖޫރިމަނާ ކުރެވިދާނެއެވެ.