ސަރުކާރުން ވެރިކަމާ ހަވާލުވުމަށްފަހު އެންމެ އިސްކަމެއްދީގެން ކުރަމުން އަންނަ އެއް ކަމަކީ ގަވާއިދާ ހިލާފަށް އުޅޭ ބިދޭސީން ރާއްޖެއިން ފޮނުވާލުމުގެ މަސައްކަތެވެ. ގަވާއިދާ ހިލާފަށް އުޅޭ ބިދޭސީން ހޯދައި ޑީޕޯޓްކުރުމުގެ މަސައްކަތް ފެށުމާއެކުހެން ބިދޭސީ ފިރިހެނުން ދިވެހި އަންހެނުންނާ ކައިވެނިކުރާ މިންވަރު ކުއްލިއަކަށް މިވަނީ އިތުރުވެފައެވެ.

ބިދޭސީންނާއި ދިވެހިންގެ ކައިވެނި އިތުރުވަމުންދިއުމާއެކު ފެމިލީ ކޯޓުން ވަނީ އެ ބިދޭސީ މީހާއަކީ ސައްހަ ވިސާއެއްގައި އުޅޭ މީހެއްތޯ ޔަގީންކުރަން ވިސާ ހުށަހަޅަންޖެހޭގޮތް ހަދާފައެވެ.

ފެމިލީ ކޯޓުގެ ތަފާސް ހިސާބުތައް ދައްކާގޮތުން މި އަހަރުގެ ފުރަތަމަ 6 މަސްދުވަހު 85 ބިދޭސީންވަނީ ދިވެހިންނާ ކައިވެނިކޮށްފައެވެ.

އާއިލާއާ ބެހޭ ގާނޫނުގައި ބުނަނީ ކީކޭ؟

އާއިލާއާ ބެހޭ ގާނޫނުގައި ބުނެފައިވަނީ ބިދޭސީއަކާ ދިވެއްސަކު ކައިވެނި ކުރެވޭނީ ކައިވެނި ކުރަން އެދޭ ފިރިހެނާ އާއި އަންހެނާގެ ކިބައިގައި، ޝަރުއީ ގޮތުން ކައިވެނި ސައްހަވުމަށްޓަކައި ހުރުން ލާޒިމުވާ ސިފަތައް ފުރިހަމަވާ ނަމަކަމަށާއި ބިދޭސީ ފިރިހެނަކު ދިވެހި އަންހެނަކާ ކައިވެނިކުރާ ނަމަ އެ މީހަކީ ރާއްޖޭގެ ކަމާބެހޭ ކޯޓުން ބަލާ ހަމަތަކުގެ މަތިން އާއިލާގެ ހަރަދު ބެލެހެއްޓޭ ވަރުގެ މީހަކަށް ވާން ޖެހޭނެކަމަށެވެ.

އިމިގްރޭޝަނުގެ ގާނޫނުގައި ބުނަނީ ރެސިޑެންޓް ވިސާ ލިބޭނެކަމަށް!

އިމިގްރޭޝަންގެ ގާނޫނުބުނާގޮތުން ދިވެއްސަކާ ކައިވެނިކޮށްގެން އުޅޭ އަދި ކައިވެނީގެ މުއްދަތުގައި ރާއްޖޭގައި ހުރުމަށް އެދޭ ބިދޭސީންނަށް ރާއްޖޭގައި ދިރިއުޅުމަށް ވޯކް ވިސާ ނެތަސް ރެސިޑެންޓް ވިސާ ލިބޭނެ ކަމަށެވެ. ދިވެއްސަކާ ކައިވެނިކޮށްގެން ދަރިއެއް ލިބިފައިވާ ބިދޭސީންގެ ތެރެއިން ވަރިވެފައިވިޔަސް އޭނާގެ ދަރިންނާ އެކު ރާއްޖޭގައި ހުރުމަށް އެދޭ ބިދޭސީންނަށް ކޮންމެ ފަސް އަހަރަކުން އެއް ފަހަރު އައު ކުރަންޖެހޭގޮތައް ވިސާ ލިބިގެންދާނެކަމަށްވެސް ގަވާއިދުގައިވަނީ ބުނެފައެވެ.

އޮޕަރޭޝަނާއެކު ފާހަގަވާކަންކަން

ގަވާއިދާ ހިލާފަށް އުޅޭ ބިދޭސީން ހޯދުމަށް މުޅި ރާއްޖޭގައި ފަށާފައިވާ އޮޕަރޭޝަނަށް މިވީ 10 މަސްދުވަހުގެ ތެރޭގައި 4،054 އަށް ވުރެގިނަ ބިދޭސީން ވަނީ އެ މީހުންގެ ޤައުމަށް އަނބުރާ ފޮނުވާލާފައެވެ.

މި އޮޕަރޭޝަންގައި އެންމެ ގިނައިން ރާއްޖެއިން ޑީޕޯޓުކޮށްފައިވަނީ ވޯކް ވިސާ ނެތް ގަވާއިދާ ހިލާފަށް އުޅޭ ބިދޭސީންކަމަށް އިމިގްރޭޝަނުން މައުލޫމާތުދެއެވެ.

މީގެކުރިން މާލެ ސަރަހައްދުގައި އޮޕަރޭޝަން ފުޅާކުރުމާއެކު އަތޮޅުތެރެއަށް ފިލައިގެންދިޔަ ބިދޭސީންގެ އަދަދު އިންތިހާއަށް އިތުރުވިއެވެ. އެއާއެކު ބިދޭސީން ފިލަންދާ ރަށްތަކަށް އަމާޒުކޮށްގެން އިމިގްރޭޝަނުން ފެށި އޮޕަރޭޝަނުގެ ސަބަބުން މި މަގުވެސް ބަންދުވީއެވެ.

އިމިގްރޭޝަނުގެ އަމާޒުހުރީ ހަމައެކަނި ގަވާއިދާ ހިލާފަށް އުޅޭ ބިދޭސީންނާ ދެކޮޅަށް ފިޔަވަޅުއަޅާކަށް ނޫނެވެ. ނަމަވެސް ގަވާއިދާ ހިލާފަށް އެމީހުން ލައްވާ މަސައްކަތްކުރުވާ ދިވެހިންނަށް ފިޔަވަޅު އެޅުމަށްވެސް ވަނީ އަމާޒު ހިފާފައެވެ. މި އުސޫލުގެ ތެރެއިން މިހާރުވެސް ގަވާއިދާ ހިލާފަށް ވަޒީފާދެމުން އަންނަ 92 ދިވެހިނަށް ލިޔުމުންވަނީ ނަސޭހަތްދީފައެވެ.

މީގެ އިތުރުން ފީ ނުދައްކާ އުޅޭ ބިދޭސީން ގިނަވުމާއި، ހުއްދަ ދީފައިވާ ތަން ނޫން އެހެން ތަންތަނުގައި މަސައްކަތް ކުރުމުގެ މައްސަލަތައް އިމިގްރޭޝަނުން ވަނީ ފާހަގަކޮށްފައެވެ.

ގަވާއިދު ބަދަލުކުރުމުގެ ވިސްނުން އެބަހުރި

"މެންދުރު އޮންލައިން" އަށް މައުލޫމާތުދެމުން އިމިގްރޭޝަނުން ބުނީ ގަވާއިދާ ހިލާފަށް އުޅޭ ބިދޭސީން ރާއްޖޭގައި ތިބުމުގެ ނިޔަތުގައި ދިވެހިންނާއި ކައިވެނިކުރުން އިތުރުވެފައިވާ މައްސަލައިގައި ކަންބޮޑުވުން އެބައޮތްކަމަށެވެ.

ކަމާ ގުޅުންހުރި އިދާރާތަކުގެ ސަމާލުކަމަށް މައްސަލަ ގެނެވިފައިވާކަމަށާއި މިކަމާ ގުޅިގެން އަޅަންޖެހޭ ފިޔަވަޅުތައް އަޅާނެކަމަށެވެ. އެގޮތުން މިކަން ހައްލުކުރުމަށް އިމިގްރޭޝަނުގެ ގާނޫނު އިތުރަށް ހަރުދަނާކުރަންޖެހޭކަމަށް ގަބޫލުކުރާކަމަށާއި އެކަން ކުރާނެކަމަށް އިމިގްރޭޝަނުން މައުލޫމާތުދެއެވެ. މިގޮތައް ކުރިއަށްގެންދެވޭ އޮޕަރޭޝަންތަކުގެސަބަބުން ފީ ދައްކާ މީހުންވެސް ގިނަވެފައިވާކަމަށް އިމިގްރޭޝަނުން މައުލޫމާތުލިބެއެވެ.

ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ހާއްސަ އިސްކަމެއްދީގެން މަސައްކަތްތަކެއް ކުރަމުން އަންނައިރު އިމިގްރޭޝަނުގެ މަގުސަދަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދައި ގަވާއިދާ ހިލާފަށް އުޅޭ ބިދޭސީންގެ ސަބަބުން ރާއްޖޭގެ އިގުތިސާދީ އަދި އިޖްތިމާއީ ފޭރާމަށް ލިބޭ ގެއްލުން ކުޑަކޮށް، އެމީހުންނަށް އިމިގްރޭޝަންގެ ގާނޫނުގެ ދަށުން ފިޔަވަޅު އެޅުމެވެ.

ސަރުކާރުގެ ވިސްނުންހުރީ ކުރިއަށް އޮތް 2 އަހަރުދުވަހުގެ ތެރޭގައި ބިދޭސީންގެ މައްސަލައަށް ހައްލު ހޯދުމަށެވެ. އެ އަމާޒަށް ވާސިލުވުމަށް ކުރަން ހުރި ކަންކަން މިހާރު ކުރަމުން އަންނައިރު އިމިގްރޭޝަނުގެ ގާނުނު ބަދަލުކޮށްގެންވިޔަސް މި މައްސަލައަށް ދާއީމީ ހައްލު ހޯދާނެކަމަށް ސަރުކާރުން ބުނެއެވެ.