ހުޅުމާލޭގައި މިއަދު ހެނދުނު ހިނގި އެކްސިޑެންޓުގައި ޝާމިލުވާ ކާރު ދުއްވަން އިން މީހާ އިނީ މަސްތުގެ ހާލަތުގައިކަމަށް ތުހުމަތުކުރެވޭކަމަށް ފުލުހުން ބުނެފިއެވެ.

މި އެކްސިޑެންޓު ހިނގި ވަގުތު މަންޒަރު ދުށް މީހަކު ދިން މައުލޫމާތަށް ބިނާކޮށް މެންދުރު ޓީވީން ކުރި ސުވާލަކަށް ޖަވާބުދެއްވަމުން ފުލުހުންގެ މީޑިއާ އޮފިސަރު ވިދާޅުވީ، މަސްތުވެގެން އިންކަމަށް ތުހުމަތުކުރެވޭ މީހާ  ހުޅުމާލޭ ފުރަތަމަ ފިޔަވަހީގެ ނިރޮޅުމަގުން ދުއްވާފައި ދިޔަ ކާރު، ކުރިމަތިން އައި އެހެން ކާރަކުން ނައްޓައި ދާން އުޅުމުގެ ތެރޭގައި ކޮންޓްރޯލް ނުވެ، ސައިކަލެއްގައި ޖެހި އެކްސިޑެންޓުވެ، ފިހާރައެއްގައި ޖެހުނު މައްސަލައެއް މިއަދު ހެނދުނު 06:00 ހާއިރު ރިޕޯޓުކޮށްފައިވާ ކަމަށެވެ.

Ad by Hajj Corporation

މި އެކްސިޑެންޓުގައި އެއްވެސް މީހަކަށް އަނިޔާވެފައި ނުވާކަމަށް މީޑިއާ އޮފިސަރު ވިދާޅުވިއެވެ.

މި މައްސަލައާ ގުޅިގެން އެކްސިޑެންޓުވި ކާރުގައި ތިބި ދެމީހުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށާއި އެއީ 29 އަހަރުގެ ދިވެހި ފިރިހެނަކާއި 26 އަހަރުގެ ދިވެހި ފިރިހެނެއްކަމަށް އޮފިސަރު ވިދާޅުވިއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.