މިއަހަރު އެންޓި ކޮރަޕްޝަން ކޮމިޝަން (އޭސީސީ) އަށް އެންމެ ގިނައިން ހުށަހެޅީ ޕްރޮކިއުމެންޓާ ބެހޭ މައްސަލަތައް ކަމަށް އެ ކޮމިޝަނުން އާންމުކުރި ތަފާސްހިސާބުތަކުން ދައްކައިފިއެވެ.

އޭސީސީއިން މިއަދު އާންމުކުރި ތަފާސް ހިސާބުތަކުން ދައްކާ ގޮތުގައި އެ ކޮމިޝަނުގައި މިއަހަރުގެ މިހާތަނަށް ޖުމްލަ 142 މައްސަލަތައް ރަޖިސްޓާ ކޮށްފައިވެއެވެ.

Ad by Hajj Corporation

އޭގެ ތެރޭގައި ޕްރޮކިއުމަންޓާ ގުޅުންހުރި 73 މައްސަލަ ހިމެނޭއިރު ދައުލަތުގެ ފައިސާއާއި ތަކެތި ބޭނުންކުރުމާ ގުޅޭ 30 މައްސަލައެއްވަނީ ރަޖިސްޓްރީކޮށްފައެވެ.

އަދި މީގެއިތުރުން ވަޒީފާއާ ގުޅުންހުރި 17 މައްސަލަ އަދި ކުއްޔަށް ދޫކުރެވޭ ބިންތަކާއި ތަކެއްޗާ ގުޅުންހުރި 22 މައްސަލައެއް ވަނީ ރަޖިސްޓްރީކޮށްފައެވެ.

މިއަހަރުގެ ފުރަތަމަ ކުއާޓަރުގައި އޭސީސީގައި ރަޖިސްޓްރީކުރި 53.8 އިންސައްތަ މައްސަލަ ހުށަހެޅީ އަތޮޅު ތެރެއިންކަމަށް އޭސީސީއިން މައުލޫމާތުދެއެވެ. އަދި ބާކީ 46.2 އިންސައްތަ މައްސަލަ ހުށަހަޅާފައި ވަނީ މާލެއިންނެވެ.

މިއަހަރުގެ ދެވަނަ ކުއާޓަރުގެ މިހާތަނަށް އޭސީސީގައި ރަޖިސްޓްރީކުރި 36.9 އިންސައްތަ މައްސަލަ ހުށަހަޅާފައި ވަނީ މާލެއިންނެވެ. އަދި އަތޮޅުތަކުން ރަޖިސްޓްރީކުރީ 63.1 އިންސައްތަ މައްސަލައެވެ.