އެމްއެމްއޭގެ ލަފާގެ މަތީން ބީއެމްއެލްގެ ނިންމުން އަނބުރާ ގެނެސްފިއެވެ.

ޕްރައިމަރީ އެކައުންޓްތަކަށް ޑޮލަރުދޫކުރުމާއި ގޮތުން މިއަދު އާއްމު ކުރި ބަދަލު މީގެ ކުރިން އަމަލު ކުރަމުން އަންނަ ގޮތާއި އެއްގޮތަށް ރުޖޫއަކޮށްފިކަމަށް ބީއެމް އެލް އިން ނެރުނު ނޫސް ބަޔާނެއްގައި ވަނީ ކަނޑައަޅާފައެވެ.

މިއަދު ފުރަތަމައަށް އާއްމު ކުރި ބަދަލުގައި ވަނީ ބީއެމްއެލް ގެ ރުފިޔާ އެކައުންޓަތަކަށް ޑޮލަރު ދޫކުރުން މެދުކަނޑާލުމަށެވެ. އަދި މިއަދުން ފެށިގެން ދޫކުރާ ޑެބިޓް އަދި ކްރެޑިޓް ކާޑުތަކަށް ވެސް ޕްރައިމަރީ އެކައުންޓަކީ ރުފިޔާ އެކައުންޓެއްނަމަ ބޭރު ފައިސާގެ ގޮތުގައި އެއްވެސް އަދަދެއް ނުދިނުމަށް ވެސް ވަނީ ކަނޑައަޅާފައެވެ.

މީގެ އިތުރުން، މިހާރު ދޫކޮށްފައިވާ ސްޓެންޑާޑް އަދި ގޯލްޑް ކްރެޑިޓް ކާޑުތަކަށް ވެސް މަހެއްގެ މައްޗަށް ލިބޭނީ 100 ޑޮލަރު ކަމަށްވެސް ބޭންކުން ވަނީ ނިންމައިފައެވެ.

ބޭންކުން ހާމަކުރިގޮތުގައި މިގޮތަށް ނިންމަން ޖެހުނީ ބޭންކަށް ލިބޭ ޑޮލަރު ދަތިވެ ކާޑު ތަކުން ކުރާ ބޭރު ފައިސާގެ މުޢާމަލާތްތައް ގިނަވުމާއި ގުޅިގެންކަމަށެވެ.

ނަމަވެސް މި ނިންމުން މިވަނީ އަނެއްކާ ބަދަލުކޮށް އެ ބޭންކްގެ ރެގިއުލޭޓަރު، މަރުކަޒީ ބޭންކް، އެމްއެމްއޭގެ އިރުޝާދާ އެއްގޮތަށް މީގެ ކުރިންވެސް އަމަލުކުރަމުން އަންނަ ގަވާއިދަށް އަމަލުކުރުމަށް ނިންމާފައެވެ.

މިއާއެކު ކުރިއެކޭ އެއްގޮތަށް ބީއެމްއެލްގެ ޑެބިޓް އަދި ކްރެޑިޓް ކާޑުތަކުން 250 ޑޮލަރާ ހަމައަށް މުއާމަލާތް ކުރެވޭނެއެވެ. އަދި، ރާއްޖެއިން ބޭރުގައި ދިރިއުޅޭ ދިވެހީންނަށް މަހެއްގެ މައްޗަށް 750 ޑޮލަރު ބޭނުންކުރެވެއެވެ.