އިސްލާމީ މަރުކަޒުގެ މުންނާރު ކައިރީ މަސްފެންގަނޑެއް ހަދައިދޭނެ ބަޔަކު ހޯދަން އިސްލާމީ ކަންތައްތަކާ ބެހޭ ވުޒާރާއިން ކުރި އިއުލާނު ބާތިލުކޮށްފިއެވެ. އެ ވުޒާރާއިން ބުނީ މި ޢިއުލާން ބާތިލްކުރީ ގައުމުގެ އިގްތިސާދީ ހާލަތު އޮތް ގޮތުން މިއީ މިފަދަ ކަންކަން ކުރަން އެންމެ މުނާސަބު ވަގުތަކަށް ނުވާތީ ކަމަށެވެ.

އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ މި ފެންގަނޑަކީ މަރުކަޒު އެޅީންސުރެ މުންނާރުގެ ތިރީގައި އޮންނަ ފެންގަނޑެއްކަމަށާއި މިހާރު ކުރިއަށްދަނީ އެ ތަން މަރާމާތުކުރުމުގެ މަސައްކަތްކަމަށެވެ.

ވުޒާރާއިން އިއްޔެކުރި އިއުލާނުގައިބުނީ އެ ތަން ހެދުމަށް ނިންމީ އިސްލާމީ މަރުކަޒަށް 40 އަހަރު ފުރުން ފާހަގަ ކުރުމުގެ ގޮތުން ކަމަށެވެ.

މަސް ފެންގަނޑު ތައްޔާރު ކުރަން ބީލަން ހުށަހެޅުމަށް ހުޅުވާލީ ކުދި އަދި މެދު ފަންތީގެ ވިޔަފާރިތަކަށެވެ.