ދިރާގު ދިވެހި ޕްރިމިއާ ލީގުގައި ކުޅުނު ވާދަވެރި މެޗުގައި، އިބްރާހިމް ވަހީދު ހަސަން (އިއްބެ ވަހީދު) ކާމިޔާބު ކޮށްދިން ހަމައެކަނި ލަނޑުން އޮޑި ސްޕޯޓްސް ކްލަބުން ނިއު ރޭޑިއަންޓް ސްޕޯޓްސް ކްލަބް 1-0 އިން ބަލިކޮށް، ދެވަނަ އިގައި އޮތް ނިއު ވައްޓާލުމަށްފަހު ތާވަލުގެ ދެވަނަ އަށް އަރައިފިއެވެ.

މިއީ އަލުން އެއްވަނަ ޑިވިޝަނަށް އެރި ނިއު ރޭޑިއަންޓް މި ސީޒަންގައި ބަލިވި ފުރަތަމަ މެޗެވެ. މި ނަތީޖާއާއެކު، މިހާތަނަށް ލީގުގައި ބަލި ނުވެ އޮތް ހަމައެކަނި ޓީމަކީ ޗެމްޕިއަން މާޒިޔާ ސްޕޯޓްސް އެވެ. އެޓީމުވަނީ ކުޅުނު ހުރިހާ މެޗަކުން މޮޅުވެފައެެވެ. އޮޑި ވެސް ވަނީ އެއް މެޗުން ބަލިވެފައެވެ. އެޓީމު ބަލިވީ އިންޓަނޭޝަނަލް ބްރޭކުގެ ކުރިން މާޒިޔާ އަތުން މެޗުގެ އެންމެ ފަހު ވަގުތުކޮޅުގައެވެ.

Ad by Hajj Corporation

މި މެޗުގެ ނަތީޖާއަށްފަހު ލީގު ތާވަލަށް ބޮޑު ބަދަލެއް އައިސްފައިވެއެވެ. މިހާތަނަށް ކުޅުނު އަށް މެޗުން ވެސް މޮޅުވެ 24 ޕޮއިންޓް ހޯދާފައިވާ މާޒިޔާ އޮތީ އެއްވަނައިގައެވެ. އޮޑި ދެވަނައަށް ޖެހިލީ 19 ޕޮއިންޓާއެކުގައެވެ. އަދި 17 ޕޮއިންޓް ލިބިފައިވާ ނިއު ރޭޑިއަންޓް ވަނީ ތިންވަނައަށް ވެއްޓިފައެވެ.

މި ދެ ޓީމުގެ މެދުގައި ކުޅުނު މި މެޗަކީ ތާރީހުގައި ވެސް ރަސްމީ މުބާރާތެއްގައި އެ ދެ ޓީމު ބައްދަލުކުރި ފުރަތަމަ ފަހަރެވެ. ލީގުގައި ނިއުރޭޑިއަންޓް ދެން އެންމެ އަވަހަށް ނިކުންނާނީ އެއްވަނައިގައިވާ މާޒިޔާ އާއި ދެކޮޅަށެވެ.