އަމީނިއްޔާ ސްކޫލުގެ ނަމުގައި އޮޅުވާލައިގެން ފައިސާ ފޭރުމުގެ ސްކޭމެއް ދައުރުވަމުންދާތީ، އެކަމަށް ސަމާލުވުމަށް އެ ސްކޫލުން ބެލެނިވެރިންނަށް ޢިލްތިމާސްކޮށްފިއެވެ.

އަމީނިއްޔާ ސްކޫލުން ބެލެނިވެރިންނަށް ފޮނުވި މެސެޖެއްގައި ވިދާޅުވެފައިވަނީ، އެސްކޫލުގެ ނަމުގައި ދައުރުވަމުންދާ މެސެޖުގައި "މޯލްޑިވްސް ޕޯސްޓަށް ފައިސާ ދެއްކުމަށް ލިންކެއް" ހިމެނޭ ކަމަށެވެ.

Ad by Hajj Corporation

ނަމަވެސް ސްކޫލުން ވަނީ މިފަދަ އެއްވެސް ކަމެއްގައި ފައިސާ ދެއްކުމަށް އެދި ލިންކެއް ނުފޮނުވާނެ ކަމަށް ޔަޤީންކަން ދީފައެވެ. ބެލެނިވެރިން މިފަދަ މެސެޖުތަކަށް އިޖާބަ ނުދިނުމަށް ސްކޫލުން ވަނީ އިލްތިމާސްކޮށްފައެވެ.

އެކި ނަންނަމުގައި ފޯނަށް ލިންކުތައް ފޮނުވައިގެން އޮޅުވާލައިގެން ފައިސާ ފޭރުމުގެ މައްސަލަތައް މިހާރު ވަނީ އިތުރުވެފައެވެ. ގޮތްނޭނގޭ ފަރާތްތަކުން މިފަދަ މެސެޖުތައް ފޮނުވަމުން ގެންދަނީ އެކި ވިޔަފާރިތަކާއި ސަރުކާރުގެ އިދާރާތަކުގެ ނަމުގައެވެ. އެހެންކަމުން މިފަދަ ލިންކުތަކަށް ސަމާލުވުމަށް ކަމާބެހޭ އިދާރާތަކުން ވެސް ދަނީ އާންމުންނަށް އިލްތިމާސްކުރަމުންނެވެ.

ފުލުހުން ވިދާޅުވާ ގޮތުގައި މިފަދަ ލިންކުތަކަށް ފިތާލުމުން އާންމުންގެ ބޭންކު އެކައުންޓުތަކުގެ އަދި ފޯނުގެ ޕާސްވޯޑުތައް ޖެހުމަށް އެދެއެވެ. މިއީ ފޯނު ހެކްކުރުމާއި، ބޭންކުގެ ޕިން ނަންބަރުތައް ނެގުމަށް ހިންގާ އުކުޅުތަކެކެވެ. އެހެންކަމުން، އިދާރާއެއްގެ ނަމުގައި ލިބޭ ލިންކުތަކަށް އެއްވެސް ހާލެއްގައި ނުވަނުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ.