ހައި ކޯޓުގެ ފަނޑިޔާރުކަމުން މިއަދު އިސްތިއުފާ ދެއްވި މުހައްމަދު ފައިސަލްއަށް ކުރެވޭ ކޮރަޕްޝަން އަދި މަނީ ލޯންޑަރިންގެ ތުހުމަތުތަކެއް އެންޓި-ކޮރަޕްޝަން ކޮމިޝަން (އޭސީސީ)ން ބަލަމުންދާ ކަމަށް އެ ކޮމިޝަނުން މިރޭ ބުނެފި އެވެ.

އޭސީސީން ބުނި ގޮތުގައި، މި މައްސަލަތައް އެ ތަނަށް ހުށަހެޅީ ފުލުހުންގެ ފަރާތުންނެވެ. މިހާރު މި މައްސަލަތައް ދަނީ ބަލަމުންނެވެ.

Ad by Hajj Corporation

ފައިސަލް މިއަދު ފަނޑިޔާރުކަމުން އިސްތިއުފާ ދެއްވި ނަމަވެސް، އޭނާ އިސްތިއުފާ ދެއްވި ސަބަބެއް ހާމައެއް ނުކުރައްވަ އެވެ. އެކަމަކު، އޭނާގެ ސުލޫކީ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ)ން ވެސް މިހާރު ދަނީ ބަލަމުންނެވެ.

ފައިސަލް ވަނީ މިއަދު މެންދުރު ޓެރަރިޒަމްގެ މައްސަލައެއްގެ ބެންޗުގައި ހިމެނިވަޑައިގެން، މައްސަލައެއް ބައްލަވައިފަ އެވެ.

އޭނާ މިދިޔަ ހަފުތާގައި ވަނީ ހައިކޯޓުގެ އިސްފަނޑިޔާރުގެ މަގާމުން ވެސް އިސްތިއުފާ ދެއްވައިފަ އެވެ.

ފައިސަލް ހައިކޯޓުގެ ފަނޑިޔާރުކަމުގެ ހުވާކުރެއްވީ ޖުލައި 24، 2018 ގައެވެ. އެއީ ކުރީގެ ރައީސް އަބްދުﷲ ޔާމީންގެ ވެރިކަމުގެ ފަހުކޮޅުގަ އެވެ.

އޭނާ ވަނީ ކުއްލިޔަތުއް ދިރާސާތުލް އިސްލާމިއްޔާއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލްކުރައްވައިފަ އެވެ. އޭސީސީން މިހާރު ބަލަމުންދާ ކޮރަޕްޝަން އަދި މަނީ ލޯންޑަރިންގެ މައްސަލަތަކާ ގުޅޭ އިތުރު ތަފްސީލެއް އަދި ހާމައެއް ނުކުރެ އެވެ.