ހއ. ދިއްދޫގައި އަލަށް ހުޅުވުނު އިސްލާމީ މަރުކަޒަކީ ރައީސް ޑރ. މުޙައްމަދު މުޢިއްޒުގެ ޒައާމަތުގައި ދިއްދޫގެ ރައްޔިތުންނަށާއި، ހއ.އަތޮޅަށް އަދި މުޅި ރާއްޖެއަށް ލިބިގެންދިޔަ ބޮޑު ޢިލްމީ ކުރިއެރުމެއް ކަމަށް، ދިއްދޫ ދާއިރާގެ މެމްބަރު އަބުދުއް ލަތީފް މުހައްމަދު ވިދާޅުވެއްޖެއެވެ.

Ad by Hajj Corporation

މި މަރުކަޒު ހުޅުވުމަކީ ދިއްދޫގެ އިތުރުން މުޅި ހއ. އަތޮޅަށާއި ޤައުމަށް ވެސް ލިބިގެންދިޔަ ދީނީ އަދި ޢިލްމީ ކުރިއެރުމެއް ކަމަށް އޭނާ ފާހަގަކުރެއްވިއެވެ.

ދިއްދޫ އިސްލާމީ މަރުކަޒު ހުޅުވުމާ ގުޅިގެން ލަތީފް ވިދާޅުވީ، ދިއްދޫގެ ލޮބުވެތި ރައްޔިތުން ވަރަށް ގިނަ ދުވަސްތަކެއް ވަންދެން މިކަމަށް އިންތިޒާރު ކުރަމުންދިޔަ ކަމަށާއި، އެ އިންތިޒާރުގެ ނިމުމަކަށް މިއައީ މި ސަރުކާރުގައި ރައީސް މުޢިއްޒުގެ ޒައާމަތުގައި ކަމަށެވެ.

 ''އަޅުގަނޑުމެން އުންމީދުކުރަން އަޅުގަނޑުމެން އުފާކުރަން މިއަދުގެ ސަރުކާރުން، ރައީސް ޑރ. މުޙަައްމަދު މުޢިއްޒުގެ ޒައާމަތުގައި ދިއްދޫގެ ލޮބުވެތި ރައްޔިތުންނަށް ލިބޭނެ އެންމެ ބޮޑު ހަދިޔާ އެންމެ ބޮޑު އިނާމު ލިބިގެންދިޔައީ މިއަދު އިސްލާމީ މަރުކަޒެއް ހުޅުވިގެން ދިޔައީމަ،'' ލަތީފް ވިދާޅުވިއެވެ.

އޭނާ އިތުރަށް ވިދާޅުވީ، ރައްޔިތުންގެ އެދުމަކީ މި މަރުކަޒު ވީހާވެސް އަވަހަކަށް ހުޅުވިގެން، ތަނުގެ ބޭނުން ހިފޭނެގޮތް ވުން ކަމަށެވެ. އަދި މި އިސްލާމީ މަރުކަޒަކީ ހަމައެކަނި ނަމާދުކުރަން ހުރި ތަނެއް ނޫން ކަމަށާއި، އެތަނަކީ ޢިލްމީ ގިނަ ކަންތައްތަކެއް ބޭނުންތައް ކުރެވޭނެ ތަނެއް ކަމަށް ވެސް ލަތީފް ވިދާޅުވިއެވެ.

ލަތީފް ވިދާޅުވީ، މި ސަރުކާރު އައި އިރު އެތަނުގެ މަސައްކަތް ރަނގަޅަށް ނުހުނގައި، މަޝްރޫޢު ނުހުންގޭ ވަރުގެ ބަޖެޓެއް ދީފައި އޮއްވައި އެކަންކަން ހައްލުކޮށްދީ އެ ތަންނިންމައި ދެއްވީ ރައީސް މުޢިއްޒުގެ ސަރުކާރުން ކަމަށެވެ. އެހެންވެ، އޭނާ ވަނީ ރައީސް މުޢިއްޒަށާއި، އިސްލާމިކް މިނިސްޓްރު ޑރ. މުޙައްމަދު ޝަހީމް ޢަލީ ސައީދަށާއި، އެ މިނިސްޓްރީގެ ވެރިންނަށް ޚާއްޞަ ޝުކުރެއް ދަންނަވާފައެވެ.