މޯލްޑިވްސް ކަރެކްޝަނަލް ސާވިސްގެ ސިވިލް ސާވިސްގެ މުވައްޒަފުންނަށް ހައުސިން އެލަވެނެސް ނުލިބޭތީ ރައީސް އޮފީހަށާއި ރައްޔިތުންގެ މަޖިލީހަށް ޕެޓިޝަން ހުށަހެޅީ އެމަސައްކަތް ކަރެކްޝަނަލް ސާވިސްއިން ކުރަމުންދަނިކޮށްކަން އެގިއްޖެއެވެ.

އިތުބާރު ހުރި މަސްދަރަކުން "މެންދުރު އޮންލައިން" އަށް މައުލޫމާތު ދީފައިވާގޮތުގައި މިކަމުގެ މަސައްކަތްތައް ކުރުމަށް މިހާރު ފިނޭންސް މިނިސްޓްރީއާއި ޕޭ ކޮމިޝަނަށްވަނީ ފޮނުވާފައެވެ. އަދި މިކަމަކީ މީގެ ކުރީގެ ސަރުކާރުތަކަށް ނުވެފައި އޮތްކަމެއްކަމަށާއި ނަމަވެސް އައު ސަރުކާރު ވެރިކަމާ ހަވާލުވުމަށްފަހު މި މަސައްކަތް ބާރުމިނުގައި ކުރިއަށްދާކަމަށް "މެންދުރު އޮންލައިން" އަށް ވަނީ މައުލޫމާތު ލިބިފައެވެ.

މޯލްޑިވްސް ކަރެކްޝަނަލް ސާވިސްގެ މުވައްޒަފުންނަށް ހައުސިން އެލަވެނެސް ނުލިބޭތީ ހުށަހަޅާފައިވާ މި ޕެޓިޝަން "މެންދުރު އޮންލައިން" އަށް ލިބިފައިވާއިރު އެ ޕެޓިޝަނުގައި ބުނެފައިވަނީ ރާއްޖޭގެ ޖަލުތަކާއި ޕެރޯލްގެ ގާނޫނުގެ ދަށުން އެ މުވައްޒަފުންނަށް ލިބެންޖެހޭ ހައުސިން އެލަވެންސް މުވައްޒަފުންނަށް ނުލިބޭކަމަށެވެ.

މޯލްޑިވްސް ކަރެކްޝަނަލް ސާވިސްގެ ވަޒީފާއާބެހޭ ގަވާއިދުގެ 57 ވަނަ މާއްދާ އަދި މުސާރަ އޮނިގަނޑުގެ 13 ވަނަ މާއްދާގައިވާ ގޮތުން މި އެލަވަންސަކީ ޖަލުތަކުގައި ނިދުމުގެ އިންތިޒާމް ހަމަޖެހިފައިވާ އޮފިސަރުންނާއި މުވައްޒަފުން ފިޔަވައި އެހެން ފަރާތްތަކަށް ލިބެން ޖެހޭ އެލަވަންސެކެވެ.

މޯލްޑިވްސް ކަރެކްޝަނަލް ސަރވިސްގެ ވަޒީފާއާބެހޭ ގަވާއިދާއި މުސާރަ އޮނިގަނޑާއި ޚިލާފަށް ޖަލުތަކުގައި ނިދުމާއި ހުރުމުގެ އިންތިޒާމް ހަމަޖެހިފައިވާ 272 ޖަލު އޮފިސަރުން ހިމެނޭހެން ހުރިހާ ޖަލު އޮފިސަރުންނަށް މި އެލަވެންސް ލިބެމުންދާކަމަށް "މެންދުރު އޮންލައިން" އަށް ވަނީ މައުލޫމާތު ލިބިފައެވެ.

މޯލްޑިވްސް ކަރެކްޝަނަލް ސާވިސްގައި ވަޒީފާއަދާކުރަމުންދާ ސިވިލް ސާވިސް މުވައްޒަފުންގެ ތެރެއިން 44 މުވައްޒަފަކު ސޮއިކޮށް ހުށަހެޅި ބިލުގައިވަނީ މިކަމާ ގުޅިގެން ކަމާގުޅުންހުރި އިދާރާތަކާ ބައްދަލުކުރަން އެދުނު ނަމަވެސް ބައްދަލުވުންތައް ބާއްވާދީފައިނުވާކަމަށް ބުނެފައެވެ.

ވުމާއެކު މި މައްސަލައަށް އަވަސް ހައްލެއް ހޯދައިދިނުމަށް ޕެޓިޝަނުގައިވަނީ ގޮވާލާފައެވެ.