ފެނުގެ ބަންކަރިން އާއިއެކު އުތުރު މެރިޓައިމް ސާވިސް (ޔޫއެމްއެސް) ގެ އައި ފުރަތަމަ އުޅަނދު އިއްޔެގެ ހެނދުނުގެ ވަގުތެއްގައި އިހަވަންދިއްޕޮޅުގައި ބަނދަރުކޮށްފިއެވެ.

މޯލްޑިވްސް ޕޯސްޓް ލިިމިޓެޑް(އެމްޕީއެލް) އިން ނެރުނު ބަޔާނެއްގައި ބުނީ ޔޫއެމްއެސްގެ ދަށުން ތައާރަފްކުރި ބައެއް ހިދުމަތްތައް ހޯދުމަށް އިހަވަންދިއްޕޮޅަށް ބަނދަރުކުރީ "ޖީއަންޖިއޭ" ނަމަކަށް ކިޔާ ތެޔޮ ޓޭންކަރެއް ކަމަށާއި، ޕެނަމާއަށް ނިސްބަތްވާ އެ ބޯޓު ދަތުރުކުރަމުންދަނީ ޔޫއޭއީގެ އަބޫދާބީން ފުރައިގެން ޗައިނާއަށް ދިއުމަށްކަމަށެވެ.

Ad by Hajj Corporation

މި ބޯޓުން ކުރޫ ބަދަލުވާ ފަޅުވެރިން ވަނީ މިއަދު ހަވީރު އުލިގަމުގައި ހަދާފައިވާ " ސީމަންސް ރެޓްސް އޭރިއާ" ހުޅުވުމަށް ބޭއްވި ރަސްމިއްޔާތުގައި ބައިވެރިވެފައެވެ.

ބޯޓުގެ ފަޅުވެރިންނަށް އުލިގަމުން ވަނީ ހޫނު މަރުހަބާއެއް ކިޔާފައެވެ. ފަޅުވެރިންނަށް މަރުހަބާ ކިޔުމަށް ބޮޑުބެރުގެ ހަރަކާތަތައް ކުރިއަށްގެންދިޔައެވެ. އަދި އުލިގަމުގެ ގިނަ އަދަދެއްގެ ރައްޔިތުން ވެސް ފަޅުވެރިންނަށް މަރުހަބާ ކިޔުމުގެ ހަރަކާތުގައި ބައިވެރިވިއެވެ.

"އިހަވަންދިއްޕޮޅަށް މިއަދު ބަނދަރުކުރި އުޅަނދުންވަނީ ޔޫ.އެމް.އެސްގެ ހިދުމަތުގެ ދަށުން ކްރޫ ޗޭންޖްގެ ހިދުމަތާއި ފެނާއި ސަޕްލައި ކުނި ނައްތާލުން އަދި ބައެއް ސްޕެއާ ޕާޓްސް ހޯދުމަށް އެދިފައެވެ. އަދި މެއިންޓަނަންސްގެ ބައެއް މަސައްކަތްތައްވެސް ކުރަންޖެހޭތީ ފަސް ވަރަކަށް ދުވަހު އިހަވަންދިއްޕޮޅުގައި މި އުޅަނދު މަޑުކުރާނެކަމަށް ލަފާކުރެވެއެވެ. " އެ ބަޔާނުގައި ވެއެވެ.

އެ ބަޔާނުގައިވަނީ ކްރޫ ޗޭންޖް ހިދުމަތުގައި މި އުޅަނދުގައި މި ވަގުތުތިބި ނުވަ ކްރޫ ރާއްޖެއިން ފުރުވާލާނެކަމަށާއި އަދި ރާއްޖެއަށް ވައުގެމަގުން އަންނަ ހަ ފަޅުވެރިން އެރުވުމުގެ އިންތިޒާމުތައް ކުރިއަށް ގެންދާނެކަމަށެވެ.