މުދާ ޝިޕްމެންޓެއްގައި ފޮރުވައިގެން ވަގަށް އެތެރެކުރަން އުޅުނު 10800 ވޭޕް ކާޓްރިޖް މޯލްޑިވްސް ކަސްޓަމްސް ސާވިސް އިން އަތުލައިގެންފިއެވެ.

ކަސްޓަމްސް އިން ބުނީ ‏ކަނޑުގެމަގުން ރާއްޖެއަށް ގެނައި މުދާ ޝިޕްމެންޓެއްގައި ޤާނޫނާ ގަވާއިދާ ޚިލާފް ތަކެތި ހުރެދާނެކަމަށް ކަސްޓަމްސްއަށް ފާހަގަކުރެވިގެން ޚާއްސަ އޮޕަރޭޝަނެއް ހިންގާފައިވާ ކަމަށެވެ.

Ad by Hajj Corporation

2025 ޑިސެންބަރު 04 ވަނަ ދުވަހު ހިންގި މި އޮޕަރޭޝަންގައި އެ ޝިޕްމަންޓް ބަލާފާސްކުރިއިރު، ޝިޕްމަންޓުގެ ތެރެއިން ގިނަ އަދަދެއްގެ ވޭޕް ފޮރުވާފައި ހުއްޓާ ފެނިފައިވާކަމަށް ކަސްޓަމްސް އިން ބުންޏެވެ.

މިގޮތުން ޖުމްލަ 10800 (ދިހަހާސް އައްސަތޭކަ) ވޭޕް ކާޓްރިޖް ހޯދައި، ކަސްޓަމްސްގެ ބެލުމުގެ ދަށަށް ގެންގޮސްފައިވާއިރު، މިތަކެތީގެ އަގު 2.7 މިލިއަން ރުފިޔާ އަށް އަރާނެކަމަށް ކަސްޓަމްސް އިން ވަނީ ބުނެފައެވެ.

މިއީ ވޭޕާއި އިލެކްޓްރޯނިކް ސިނގިރެޓް މަނާކުރުމަށް ސަރުކާރުން ނިންމި 15 ނޮވެމްބަރު 2024ގެ ފަހުން ހިފަހައްޓާފައިވާ އެންމެ ބޮޑު ވޭޕް ޝިޕްމަންޓެވެ. މި ތާރީޚްގެ ފަހުން ކަސްޓަމްސް އިން ވަނީ 66،000 އަށްވުރެ ގިނަ ވޭޕް އަތުލައިގެންފައެވެ.