ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވެރިކަމުގެ ވައުދުފުޅެއް ކަމަށްވާ 5 މިލިއަން ގަސް އިންދުމުގެ މަޝްރޫޢުގެ ދަށުން މިހާތަނަށް 985,083  ގަސް އިންދިފައިވާކަމަށް، ތިމާވެއްޓާ ބެހޭ ވުޒާރާގެ ތަފާސްހިސާބުތަކުންދައްކައިފި އެވެ.

ފަސް މިލިޔަން ގަސް އިންދުމުގެ ޕްރޮގުރާމަކީ ރާއްޖެއިން ނެތެމުންދާ ގަސްތައް އަލުން އާލާކުރުމާއި ފެހިކަން އިތުރުކޮށް މާހައުލީ ނިޒާމު ދެމެހެއްޓުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ ޕްރޮގުރާމެކެވެ. މި މަޝްރޫއުގެ ތެރެއިން މިއަދާ ހަމައަށް ނުވަ ލައްކައަށްވުރެ ގިނަ ގަސް އިންދާފައިވާއިރު،  ގައުމީ މި މަޝްރޫޢުގައި ސަރުކާރުގެ އިދާރާތަކާއި، ކުންފުނިތަކާއި، ކައުންސިލްތަކާއި އަދި ރިސޯޓުތައް ފަދަ ތަފާތު ފަރާތްތަކުން ބައިވެރިވެއެވެ. އަދި މި މަޝްރޫޢުގެ އަމާޒަކީ ޖުމްލަ 6.4 މިލިއަން ގަސް އިންދުންކަމަށް ތިމާވެއްޓާ ބެހޭ ވުޒާރާއިން ބުނެފައިވެއެވެ.

Ad by Hajj Corporation

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ފެއްޓެވި 5 މިލިއަން ގަސް އިންދުމުގެ ގައުމީ މަޝްރޫޢު، ވަރަށް ބޮޑު ކާމިޔާބީއެއް ހާސިލުކުރަމުން، ފުރިހަމައަށް ކުރިއަށްދާކަމަށް ވެސް ވުޒާރާއިން ބުނެއެވެ. މި މަޝްރޫޢަކީ ދިވެހިރާއްޖެއަށް ދެމެހެއްޓެނިވި ފެހިކަމެއް ގެނެސްދިނުމަށްޓަކައި ސަރުކާރުން އިސްކަންދޭ އެއްކަމެވެ.

މި މަޝްރޫޢުގެ ތެރެއިން މިހާތަނަށް ދިވެހިރާއްޖޭގެ އެކި ރަށްރަށުގައި ގިނަ އަދަދެއްގެ ގަސް އިންދާފައިވާއިރު، މިކަމަށްޓަކައި ސަރުކާރުގެ އިދާރާތަކާއި، އަމިއްލަ ޖަމިއްޔާތަކާއި، ސްކޫލުތަކާއި، ކައުންސިލުތަކުގެ އިތުރުން ރައްޔިތުންގެ ފަރާތުންވެސް ވަރަށް ބޮޑު އެހީތެރިކަމެއް ލިބެމުންދެއެވެ. ކޮންމެ ގަހެއް އިންދުމަކީވެސް ދިވެހިރާއްޖެ އިތުރަށް ފެހިވެ، ދުޅަހެޔޮ މާހައުލެއް ގާއިމުކުރުމަށް އެޅޭ މުހިންމު ފިޔަވަޅެއްކަމަށް މަޝްރޫޢުގެ އޮފިޝަލުން ހާމަކުރައްވައެވެ.

މި މަޝްރޫޢުގެ ކާމިޔާބީގައި އެހީތެރިވާ ހުރިހާ ފަރާތްތަކަށް، މަޝްރޫޢުގެ އޮފިޝަލުންވަނީ ވަރަށް ބޮޑަށް ޝުކުރު އަދާކުރައްވާފައެވެ. ގަސް އިންދުމަކީ ހަމައެކަނި ފެހިކަން އިތުރުކުރުމެއް ނޫންކަމަށް، އެ ފަރާތްތަކުން ފާހަގަކުރައްވައެވެ. މިއީ މާހައުލަށް ދިރުން ގެނެސް، ދުނިޔޭގެ މޫސުމަށް އަންނަ ބަދަލުތަކާ ކުރިމަތިލުމަށް އެޅޭ މުހިންމު ފިޔަވަޅެކެވެ. މި މަޝްރޫޢަކީ ދިވެހިރާއްޖޭގެ ރައްޔިތުން އެކުގައި މަސައްކަތްކޮށް، ގައުމީ ފެންވަރުގައި ތިމާވެއްޓަށް އިސްކަންދިނުމުގެ ރަމްޒެކެވެ.

ކުރިއަށް އޮތްތަނުގައިވެސް ގަސް އިންދުމުގެ ޕްރޮގްރާމްތައް އިތުރުކޮށް، 5 މިލިއަން ގަހުގެ ލަނޑުދަނޑި ހާސިލްކުރުމަށް މަސައްކަތްކުރާނެ ކަމަށް މަޝްރޫޢުގެ އޮފިޝަލުން ވިދާޅުވިއެވެ. މި މަޝްރޫޢު ނިމިގެންދާއިރު، ދިވެހިރާއްޖެ ވާނީ އިތުރަށް ފެހިވެ، ދުޅަހެޔޮ މާހައުލެއް ގާއިމުވެފައިވާ ގައުމަކަށެވެ.