ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުންނަށް މި އަހަރު ދޭނެ އެންމެ ބޮޑު އަހަރީ ބޯނަސްގެ އަދަދަކީ 18،600ރ. ކަމަށް އެ ކުންފުނިން ކަނޑައަޅައިފި އެވެ.

މި އަދަދު ކަނޑައަޅާފައިވަނީ ކުންފުނީގެ ބޯޑުން ފާސްކޮށް، ފިނޭންސް މިނިސްޓްރީގެ ހުއްދައާއެކުގައެވެ. މި ބޯނަސް ދިނުމުގެ ނިންމުމަކީ މުވައްޒަފުންގެ ހިތްހަމަޖެހުން އިތުރުކުރުމަށް އެޅުނު މުހިންމު ފިޔަވަޅެކެވެ.

Ad by Hajj Corporation

މި އަހަރުގެ އެންމެ ބޮޑު ބޯނަސް އަދަދު ކަމަށްވާ 18،600ރ. އަކީ މިދިޔަ އަހަރު ކަނޑައެޅި 10،000ރ. އާއި އަޅާބަލާއިރު ބޮޑުތަނުން އިތުރު އަދަދެކެވެ.

ނަމަވެސް، ހުރިހާ މުވައްޒަފުންނަކަށް ވެސް 18،600ރ. ގެ ބޯނަސް އެއް ނުލިބޭނެއެވެ. ބޯނަސްގެ ފައިސާ ދޫކުރަނީ މުވައްޒަފުން އެ އަހަރު ކުންފުނީގައި ހިދުމަތްކުރި މުއްދަތަށް ރިއާޔަތްކޮށް ކަމަށް އެޗްޑީސީން ބުނެއެވެ. އެހެންކަމުން، ކޮންމެ މުވައްޒަފަކަށް ލިބޭނެ އަދަދު ތަފާތުވާނެއެވެ.

ދައުލަތުގެ ކުންފުނިތަކުން އަހަރީ ބޯނަސް ދޫކުރުމުގެ އުސޫލަކީ، ކުންފުނީގެ މާލީ ހާލަތު ވަޒަންކުރުމަށްފަހު، ކުންފުނީގެ ބޯޑުން ފާސްކޮށް، ފިނޭންސް މިނިސްޓްރީގެ ހުއްދަ ހޯދައިގެން ކުރިއަށް ގެންދާ ކަމެކެވެ. އެޗްޑީސީން މި އަހަރު މި ބޯނަސް ދިނުމަށް ނިންމާފައިވަނީ ވެސް މި އުސޫލުގެ ދަށުންނެވެ.