ހުޅުމާލޭގެ މަގުތަކާއި އާންމު ތަންތަނުގެ އިތުރުން އިމާރާތްތަކުގެ އަމާންކަން 24 ގަޑިއިރު ބެލެހެއްޓުމަށް، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން އެސްޓޭޓް ސެކިއުރިޓީގެ ހިދުމަތް ރޭ ތައާރަފުކޮށްފިއެވެ.

އެޗްޑީސީން މީސްމީޑިއާގައި ކުރި ޕޯސްތެއްގައި ބުނެފައިވަނީ، ފަރުކޮޅުފުށީގައި ރޭ ބޭއްވި "ސޭފާ ހުޅުމާލެ" އިވެންޓުގައި މުޖުތަމައުގެ ރައްކާތެރިކަން ކަށަވަރުކުރުމަށް"އެސްޓޭޓް ސެކިއުރިޓީ ސާވިސް"ގެ ނަމުގައި އާ ހިދުމަތެއް ފަށާފައިވާ ކަމަށެވެ.

Ad by Hajj Corporation

ރޭގެ އިވެންޓުގައި ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވީ ވަރަށް ބޮޑު އާބާދީއެއް ދިރިއުޅޭ އަދި މުސްތަގުބަލުގައި ވެސް ބޮޑު އާބާދީއެއް ދިރިއުޅޭނެ ހުޅުމާލޭގެ އިމާރާތްތަކާއި އޮފީސްތަކާއި ވިޔަފާރިކުރާ ވަރަށް ގިނަ ތަންތަނުގެ ސެކިއުރިޓީ ބެލެހެއްޓުމުގެ މަސައްކަތް އެ ކުންފުނިން މިހާރު ވެސް ކުރަމުން އަންނަ ކަމަށާއި އެ ކުންފުނިން މިހާރު ދޭ ސެކިއުރިޓީގެ ހިދުމަތުގެ ފެންވަރުގެ ރަނގަޅު ކުުރުމަށް ވަރަށް ގިނަ ފިޔަވަޅުތަކެއް އަޅައި، ރިފޯމްކުރުމުގެ މަސައްކަތް ކުރަމުން އަންނަ ކަމަށެވެ.

ހުޅުމާލޭގެ މަގުތަކާއި އާންމު ތަންތަނާއި އިމާރާތްތަކުގެ ސެކިއުރިޓީ ބެލެހެއްޓުމުގެ މަސައްކަތުގައި 24 ގަޑިއިރު، އެ ހިދުމަތުގެ މުވައްޒަފުން މަސައްކަތްކުރާނެކަމަށް ޒުހައިރު ވިދާޅުވިއެވެ. އަދި މުވައްޒަފުން ތިބޭނީ އެކަމަށް ހާއްސަ ޔުނީފޯމުގައި އެއީ ކޮންބައެއްކަން އެނގޭނެ ގޮތަށް ކަމަށްވެސް ޒުހައިރު ވިދާޅުވިއެވެ. ރޭގެ އިވެންޓުގައި ވަނީ މި ޔުނީފޯމު ދައްކާލާފައެވެ.

އެޗްޑީސީން އެސްޓޭޓް ސެކިއުރިޓީގެ ހިދުމަތް ތައާރަފުކުރި އިރު، ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލުން ވެސް ހުޅުލޭގެ އާންމު ތަންތަނުގެ ރައްކާތެރިކަން ބެލެހެއްޓުމަށްޓަކައި އެސްޓޭޓް ސެކިއުރިޓީގެ ހިދުމަތް މިއަހަރު ތައާރަފުކޮށްފައިވެއެވެ.

އެޗްޑީސީން ބަލަހައްޓާ ހިޔާ ފްލެޓާއި ވިނަރެސް ފްލެޓްތަކުގެ ސެކިއުރިޓީއަށް މިހާރުވެސް އެކުންފުނީގެ މުވައްޒަފުން ތިބެއެވެ.