ޤަތަރުގައި ކުރިއަށްދާ ފީފާ އަރަބް ކަޕްގެ ފައިނަލަށް މޮރޮކޯ އާއި ޖޯޑަން ދަތުރުކޮށްފިއެވެ. ސެމީ ފައިނަލްގައި މި ދެ ޓީމު މޮޅު ކުޅުމެއް ދައްކައި، ތަޖުރިބާ އާއި ތާރީޚީ ކާމިޔާބީއަކަށް ވާސިލްވުމުގެ މަގު ފަހިކޮށްފައިވާއިރު، ފައިނަލް މެޗު ވާނީ ވަރަށް ވާދަވެރި މެޗަކަށެވެ.

މުބާރާތުގެ ކުރިން ވެސް ފޭވަރިޓުންގެ ގޮތުގައި ފާހަގަކުރެވުނު މޮރޮކޯ ޓީމުން ވަނީ ޚަލީފާ އިންޓަރނޭޝަނަލް ސްޓޭޑިއަމްގައި ކުޅުނު ސެމީ ފައިނަލް މެޗުގައި ޔުނައިޓެޑް އަރަބް އެމިރޭޓްސް (ޔޫއޭއީ) އަތުން 3–0 ގެ ބޮޑު މޮޅެއް ހޯދާފައެވެ. މެޗުގެ ފުރަތަމަ ކޮޅު މޮރޮކޯގެ ހަމަލާތަކަށް ޔޫއޭއީން ވަރަށް ވަރުގަދަ ދިފާޢެއް ދައްކަމުން ދިޔައެވެ. ނަމަވެސް، މޮރޮކޯއަށް ލީޑު ނެގުނީ 28 ވަނަ މިނެޓުގައެވެ. ހަމްޒާ އަލް މޫސާވީ ނެގި ތަނަވަސް ހުރަހަކުން ކަރީމް އަލް ބަރކާވީ ވަނީ ބޮލުން ގޯލު ޖަހައި، އެޓްލަސް ލަޔަންސްއަށް ލީޑު ހޯދައިދީފައެވެ.އަދި ޔޫއޭއީގެ ކުޅުންތެރިން ގިނަ އަދަދަކަށް ކުރިއަށް ޖެހުމުގެ ފުރުސަތުގެ ބޭނުންކޮށް، 84 ވަނަ މިނެޓުގައި އަޝްރަފް އަލް މަހްދީވީ ކައުންޓަރ އެޓޭކެއްގައި ގޯލު ޖަހައި މޮރޮކޯގެ ޖާގަ ކަށަވަރުކުރިއެވެ. މެޗުގެ އިތުރު ވަގުތުގައި ތަޖުރިބާކާރު ފޯވާޑް އަބްދުއްރައްޒާޤް ހަމްދަﷲ ޖެހި ތިންވަނަ ގޯލާއެކު މޮރޮކޯގެ މޮޅު ކަށަވަރުވިއެވެ.

Ad by Hajj Corporation

އަނެއް ސެމީ ފައިނަލްގައި ޖޯޑަން ވަނީ އޭޝިއާގެ ގަދަބާރު ސައުދީ އަރަބިއްޔާ އަތުން 1–0 އިން މޮޅުވެ، އެ ޓީމުގެ ތާރީޚުގައި ފުރަތަމަ ފަހަރަށް އަރަބް ކަޕްގެ ފައިނަލަށް ދަތުރުކޮށްފައެވެ. ޑިފެންސަށް ވަރަށް ބޮޑަށް ސަމާލުކަން ދީގެން ދެޓީމުން ކުޅުނު މި މެޗުގެ ނަތީޖާ ނިކުތީ 66 ވަނަ މިނެޓުގައެވެ. މަޙްމޫދު އަލް މާރިދީ ނެގި ހުރަހަކުން އަލް ރަޝްދާން ވަނީ ބޮލުން ގޯލު ޖަހައި ޖޯޑަންއަށް މޮޅު ހޯދައިދީފައެވެ. ސައުދީ އަރަބިއްޔާއިން ފަހުކޮޅު ވަރަށް ބޮޑަށް މަސައްކަތްކުރި ނަމަވެސް، ގޯލްކީޕަރު ޔަޒީދު އަބުލައިލާ ވަނީ މިހަމަލާތައް ހުއްޓުވާފައެވެ.

މިމުބާރާތުގެ ފައިނަލް ކުޅޭނީ މިމަހުގެ 18 ވަނަ ދުވަހުގެ ރޭގަނޑު ރާއްޖެގަޑިން 9 ޖަހާއިރުގައެވެ.