ދުނިޔޭގެ ފުޓްބޯޅައިގެ މައި އިދާރާ، ފީފާއިން ދަނީ ޔޫރަޕްގެ ފުޓްބޯޅައިގައި ބޮޑު ބަހުސެއް އުފެދިފައިވާ އާ ގަވާއިދެއް ތައާރަފުކުރުމަށް ތައްޔާރުވަމުންނެވެ. "ޕްރެސްޓިއާނީ ލޯ" ގެ ނަމުން ނަންދެވިފައިވާ މި އިސްލާހުގެ މަގްސަދަކީ، އިދިކޮޅު ކުޅުންތެރިންނަށް ހުތުރުބަހުން މުއާމަލާތްކުރާއިރު ގަސްދުގައި އަނގަމަތީގައި އަތްއަޅައިގެން ވާހަކަދައްކާ ކުޅުންތެރިންނަށް އަދަބު ދިނުމެވެ.

މި މައްސަލައަކީ އާ މައްސަލައެއް ނޫން ނަމަވެސް، ދާދިފަހުން ޗެމްޕިއަންސް ލީގުގައި ހިނގި ހާދިސާއަކާ ގުޅިގެން މިކަމަށް ވަނީ ބޮޑު ސަމާލުކަމެއް ލިބިފައެވެ. ކުޅުންތެރިން ޖާޒީން ނުވަތަ އަތުން އަނގަމަތި ނިވާކުރުމުން، ކިތަންމެ ގިނަ ކެމެރާ އެންގަލްތަކެއް ހުރި ނަމަވެސް، އެމީހުން ބުނި އެއްޗެއް ދެނެގަތުމަކީ ތަހުގީގު ކުރާ ފަރާތްތަކަށް ނުހަނު އުނދަގޫ ކަމެކެވެ. މިދިޔަ އަންގާރަ ދުވަހުގެ ރޭގައި ކުޅުނު ޗެންޕިއަންސް ލީގުގެ މެޗުގައި ރެއާލް މެޑްރިޑްގެ ކުޅުންތެރިއެއްކަމަށްވާ ވިނީސިއަސް އާއި ނަސްލީގޮތުން ދިމާކުރިކުރިކަމަށްބުނެ މިހާރު ވަނީ ބޮޑޫ ބަހުސެއް އުފެދިފައެވެ.

Ad by Hajj Corporation

މެޗުތަކުގެ ފޯރިގަދަ ވަގުތުތަކުގައި، ކެމެރާތަކަށް ތުންފަތުގެ ހަރަކާތްތައް ނުފެންނާނެހެން އަނގަމަތި ނިވާކުރުމަކީ ކުޅުންތެރިންގެ މެދުގައި އާންމު ކަމެކެވެ. މިފަދަ ދަނޑިވަޅުތަކުގައި ނަސްލީ ތަފާތުކުރުމުގެ ނުވަތަ އިހާނެތި ބަސްތަކެއް ބޭނުންކުރި ނަމަވެސް، ސާފު ހެއްކެއް ނެތުމުގެ ސަބަބުން އަދަބު ދިނުމުގައި ގާނޫނީ ހުރަސްތަކެއް ކުރިމަތިވެއެވެ.

މި ހުށަހެޅުން ތައާރަފުކޮށްފައިވަނީ ފީފާގެ "ޕްލޭޔާސް ޕެނަލް" އިންނެވެ. މިއީ ފުޓްބޯޅައިގައި ނަފުރަތު އުފެއްދުމާއި ދެކޮޅަށް މަސައްކަތްކުރާ ކުރީގެ ކުޅުންތެރިންގެ ގްރޫޕެކެވެ. މި ގަވާއިދުގެ ދަށުން، އާންމު ޓެކްޓިކަލް ވާހަކަތަކާއި، ހުތުރު ބަސްތައް ފޮރުވުމަށް ކުރާ އިޝާރާތްތައް ވަކިކުރެވޭނެއެވެ. އަދި ބުނި ބަސް ސާފުކޮށް ސާބިތު ނުކުރެވުނު ނަމަވެސް، ކަންކަން ފޮރުވުމަށް އަނގަމަތި ނިވާކުރުމަކީ އަމިއްލައަށް ކުށަކަށް ވުމުގެ ފުރުސަތު އެބައޮތެވެ.

މި އިސްލާހު ފާސްވެއްޖެނަމަ، މިއީ ފާއިތުވި އަހަރުތަކުގައި ފުޓްބޯޅަ ދަނޑުމަތީގައި އާންމުވެފައިވާ އާދައަކަށް އަންނާނެ ބޮޑު ބަދަލެކެވެ. ނަސްލީ ތަފާތުކުރުމާއި ހުތުރު ބަސްތަކާ ދެކޮޅަށް ބައިނަލްއަގުވާމީ ފެންވަރުގައި ކުރާ މަސައްކަތްތައް ވަރުގަދަކުރުމުގެ ގޮތުން ފީފާއިން ދަނީ މިފަދަ ހަރުކަށި ފިޔަވަޅުތަކަށް ތާއީދުކުރަމުންނެވެ.

މިހާތަނަށް "ޕްރެސްޓިއާނީ ލޯ" ރަސްމީކޮށް އަމަލުކުރަން ފަށާފައި ނުވި ނަމަވެސް، މިއީ ކުޅިވަރުގެ އަދަބު އަޚްލާގު ހިފެހެއްޓުމަށް ފީފާއިން ކުރާ މުހިންމު މަސައްކަތެކެވެ. ކޮންމެ ހަރަކާތެއް ކެމެރާތަކުން ބަލަމުންދާ މި ޒަމާނުގައި، ފޮރުވިގެން ތިބެ ހުތުރު ބަސްތައް ބޭނުންކުރުމުގެ ފުރުސަތު ކުޅުންތެރިންނަށް ވަރަށް އަވަހަށް ބަންދުވެގެންދާނެ ކަމަށް ބެލެވެއެވެ.