ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ފީފާއިން ގެންގުޅުނު ދެބަސްވުންތައް ބޮޑު ރޭވުން، އެ އިދާރާގެ ރައީސް ޖިއާނީ އިންފަންޓީނޯ ދޫކޮށްލައްވައިފިއެވެ. މިއީ ގައުމީ ފެޑެރޭޝަންތަކާއި ކްލަބުތަކުން ކުރިމަތިކުރުވި ވަރުގަދަ ފިއްތުންތަކާ ގުޅިގެން ފީފާއިން ނިންމި ކުއްލި ނިންމުމެކެވެ.

ފީފާގެ ރައީސް ނެރުއްވި ރަސްމީ ބަޔާނެއްގައި ކަށަވަރުކޮށްދެއްވި ގޮތުގައި، "ފީފާ ފޯވާޑް އެންޓަރޕްރައިޒް" ގެ ނަމުގައި ކުރިއަށް ގެންދަން އުޅުނު މަޝްރޫއު މިހާރު ވަނީ ހުއްޓާލާފައެވެ. މި މަޝްރޫއުގެ މަގްސަދަކީ ވޯލްޑް ކަޕުން އާމްދަނީ ހޯދާ ވަސީލަތްތައް ވަކި ކުންފުންޏަކަށް ބަދަލުކޮށް، ބޭރުގެ އިންވެސްޓަރުންނަށް އެ ފުރުސަތު ހުޅުވާލުމެވެ.

Ad by Hajj Corporation

މި ނިންމުމާ ގުޅޭގޮތުން އިންފަންޓީނޯ ވިދާޅުވީ، "އެކި ފަރާތްތަކުގެ ޚިޔާލުތަކަށް ވަރަށް ފަރުވާތެރިކަމާއެކު އަޑުއެހުމަށްފަހު، މި މަޝްރޫއުގެ ސަބަބުން އުފެދިފައިވާ ބައިބައިވުންތަކަކީ އަލްލާ ކަނޑައެޅި މަގްސަދާ އެއްގޮތަށް ކުރިއަށްދެވޭނެ ކަމެއް ނޫންކަން ސާފުވެއްޖެ" ކަމަށެވެ. އަދި އޭނާގެ އަބަދުވެސް އަމާޒަކީ ފުޓްބޯޅަ އާއިލާ އެއްބައިކޮށް ކުރިއެރުވުން ކަމަށް ވިދާޅުވިއެވެ.

މި މަޝްރޫއާ ދެކޮޅަށް ޔޫއެފާގެ 55 މެންބަރު ގައުމަކުން ވަނީ ވަރުގަދަ އިހުތިޖާޖެއް ކޮށްފައެވެ. އޭގެ ތެރޭގައި އިޓަލީ ފަދަ ގައުމުތައް ހިމެނޭއިރު، މި ރޭވުން ކުރިއަށް ގެންގޮސްފިނަމަ ވޯލްޑް ކަޕާއި ފީފާގެ ހުރިހާ މުބާރާތްތަކެއް ބޮއިކޮޓް ކުރާނެ ކަމުގެ އިންޒާރުވެސް ވަނީ ދީފައެވެ. މީގެ އިތުރުން އުތުރު އެމެރިކާ އާއި އޭޝިއާގެ ކޮންފެޑެރޭޝަންތަކުންވެސް މިކަމާ ދެކޮޅު ހަދާފައިވާއިރު، ފީފާގެ ސީނިއާ އެޑްވައިޒަރު ކާލޯސް ކޯޑޭރޯ ވަނީ މިކަމާ ދެކޮޅު ހެއްދެވުމުގެ ގޮތުން އިސްތިއުފާ ދެއްވާފައެވެ.

ރިޕޯޓްތައް ބުނާގޮތުން މި މަޝްރޫއުގެ ދަށުން 20 ބިލިއަން ޑޮލަރަށް އަގުކުރެވޭ ފީފާގެ ވިޔަފާރީގެ 20 އިންސައްތަ ހިއްސާ ވިއްކާލައިގެން 4.2 ބިލިއަން ޑޮލަރު ހޯދުމަށް ވަނީ ރާވާފައެވެ. މި އިންވެސްޓްމަންޓް އިސްކޮށް ހިންގުމަށް ހަމަޖެހިފައި އޮތީ ޖޯޝުއާ ކުޝްނާ އިސްވެ ހުންނަވާ ގްރޫޕަކުންނެވެ.

ކުދި ފެޑެރޭޝަންތައް ވަރުގަދަކުރުމުގެ ވަސީލަތެއްގެ ގޮތުގައި މި މަޝްރޫއު ސިފަކުރެއްވި އިންފަންޓީނޯ މިހާރު ވިދާޅުވަނީ، ކުރިއަށް އޮތް ހަފްތާތަކުގައި ހުރިހާ ފަރާތްތަކާ ގުޅިގެން މަސައްކަތް ކުރަން ބޭނުންވާ ކަމަށެވެ. ނަމަވެސް، މިވަގުތަށް ފުޓްބޯޅައިގެ އެންމެ ބޮޑު މުބާރާތް ވިއްކާލުމުގެ ވިސްނުން މިވަނީ މަޑުޖައްސާލާފައެވެ.