ށ. ފީވަކަށް ދަތުރު ކުރި ދޯންޏެއް ދިޔަވެ ކަނޑުވި މީހަކު، ފުލުހުން ސަލާމަތްކޮށްފިއެވެ.

ފުލުހުން މައުލޫމާތުދީފައިވާ ގޮތުގައި ށ. ފުނަދޫން އެއަތޮޅު ފީވަކަށް ދަތުރު ކުރަނިކޮށް ދޯންޏެއް ދިޔަވެ، އަޑިއަށްދާ ކަމުގެ މައުލޫމާތު މިއަދު ހެނދުނު 11:50 ހާއިރު ލިބުމުން، ދޯނި ދިޔަވި ސަރަހައްދަށް ފުލުހުންގެ ލޯންޗު ގޮސް ބެލުމުގައި، ދޯނިން ދަތުރުކުރި މީހާ ފީވަށް ކައިރީ ކަނޑު ތެރެއިންވަނީ ފެނިފައެވެ. އެއީ، އުމުރުން 68 އަހަރުގެ ދިވެހި ފިރިހެނެއް ކަމަށް ފުލުހުން ބުނެއެވެ.

ފުލުހުން ބުނީ، އެމީހާ ސަލާމަތްކޮށް ފުލުހުންގެ ލޯންޗުގައި ފީވަކަށް ގެންގޮސްފައިވާ ކަމަށާއި، އޭނާގެ ހާލު ރަނގަޅު ކަމަށެވެ.

މިހާތަނަށް ބެލި ބެލުމުން އެމީހާ ދަތުރުކޮށްފައިވަނީ އެކަނިކަން އެނގިފައިވާ ކަމަށް ފުލުހުން ބުނެއެވެ. އެދޯނީގެ ބައެއް ތަކެތި އޮޔާދާތީ، އެ ސަރަހައްދުން ދަތުރުކުރާ ފަރާތްތަކުން ހާއްސަ ސަމާލުކަމެއް ދީގެން ދަތުރު ކުރުމަށް ފުލުހުން އިލްތިމާސްކޮށްފައި ވެއެވެ.