ފަތުރުވެރިކަމާއި މަތީ ތަޢުލީމުގެ ދާއިރާތަކުން އިތުރަށް ގުޅުން ބަދަހިކުރުމަށް ރާއްޖެއާއި ޕާކިސްތާނާ ދެމެދު މަޝްވަރާކޮށްފިއެވެ.

މި މަޝްވަރާތައް ކުރިއަށްގެންދިޔައީ ޕާކިސްތާނުގެ ޤާނޫނުހަދާ މަޖިލީހުގެ ރައީސް ސަރްދާރް އަޔާޒް ޞާދިޤް މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސުލްޖުމްހޫރިއްޔާގެ ނައިބު، އަލްއުސްތާޛް ހުސައިން މުޙައްމަދު ލަތީފާ ބައްދަލުކުރައްވައި ކުރެއްވި މަޝްވަރާތަކުގެ ތެރެއިންނެވެ.

Ad by Hajj Corporation

މި ބައްދަލުވުމުގައި ނައިބު ރައީސް ވަނީ ރާއްޖެއާއި ޕާކިސްތާނާ ދެ ގައުމުގެ ދެމެދު އޮތް ޒަމާންވީ ގާތް ރަހުމަތްތެރިކަމުގެ ގުޅުމުގެ މައްޗަށް އަލިއަޅުއްވާލައްވައި އެކި ދާއިރާތަކުން ޕާކިސްތާނުން ރާއްޖެއަށް ވެދެއްވަމުން ގެންދަވާ އެހީތެރިކަމަށް ޝުކުރުއަދާކުރައްވާފައެވެ.

މީގެ އިތުރުން ފަތުރުވެރިކަމާއި މަތީ ތަޢުލީމު ފަދަ ދާއިރާތަކުން އިތުރަށް ގުޅުން ބަދަހިކުރާނެ ގޮތްތަކާއި ބެހޭގޮތުން ވެސް ދެބޭފުޅުން ވަނީ މަޝްވަރާކުރައްވާފައެވެ.

މި ބައްދަލުކުރެއްވުން ނިންމަވައިލައްވަމުން، ދެ ޤައުމުގެ ލީޑަރުން ވެސް ވަނީ ދެ ޤައުމުގެ ގުޅުން އިތުރަށް ވަރުގަދަކުރުމުގެ ޢަޒުމް އާކުރައްވާފައެވެ.

ޕާކިސްތާނުގެ ގާނޫނުހަދާ މަޖިލީހުގެ ރައީސް ރާއްޖެއަށް ކުރައްވަމުން ގެންދަވާ ދަތުރުފުޅަކީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް އަބްދުﷲގެ ދަޢުވަތަކަށް އެމަނިކުފާނު ކުރައްވަމުން ގެންދަވާ 3 ދުވަހުގެ ރަސްމީ ދަތުރުފުޅެކެވެ.