ހިޔާ ފްލެޓުތަކުގެ މެއިންޓަނަންސްއަށް ދައްކަންޖެހޭ 2 ލައްކަ ރުފިޔާގެ ފީ މާފުކުރުމަށް ރިޔާސީ އިންތިޚާބުގެ ތެރޭގައި ވެވަޑައިގެންނެވި ވަޢުދުފުޅު ފުއްދަވާނެކަން ރައީސް ޑރ. މުޙައްމަދު މުޢިއްޒު ކަށަވަރުކޮށްދެއްވައިފިއެވެ.

ހުޅުމާލޭ ދެވަނަ ފިޔަވައްސަށް ޚާއްސަކޮށްގެން އެ ސަރަހައްދުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް މުޢިއްޒު ވަނީ، އެމަނިކުފާނުގެ ވެރިކަމުގެ ފުރަތަމަ ދުވަސްތަކުގެ ތެރޭގައި ވެވަޑައިގެންނެވި ވަޢުދުތައް ފުއްދަވައިދެއްވާނެކަން ތަކުރާރުކުރައްވާފައެވެ.

Ad by Hajj Corporation

މެއިންޓަނަންސް ފީގެ ގޮތުގައި ދައްކަންޖެހޭ 2 ލައްކަ ރުފިޔާ އުނިކޮށްދިނުމުގެ މަސައްކަތް އެޗްޑީސީއާ ގުޅިގެން މިހާރު ކުރިއަށްދާކަމަށް ރައީސް ވިދާޅުވިއެވެ.

"އަޅުގަނޑު ދަންނަވާފައި އޮންނާނެ، 2 ލައްކަ ރުފިޔާގެ ޑިސްކައުންޓެއް ދެއްވާނެކަމަށް. އެކަންވެސް އަޅުގަނޑު ދެންނެވިގޮތަށް އެކަން ކުރުމަށްޓަކައި އަޅުގަނޑު އެޗްޑީސީއަށް މިހާރު އޮންނާނީ ދަންނަވާފައި. އެހެންވީމަ ތިބޭފުޅުންގެ އެގްރީމަންޓު ބަދަލުވެގެންދާއިރު ތިވިދާޅުވީ ކަންބޮޑުވުންތައް އެއީ އަޅުގަނޑު ބަލާނެ ކަންތައްތައް. އެ 2ލައްކަ ރުފިޔާ އަޅުގަނޑު ދެންނެވިގޮތަށް އުނިކުރުމަށްޓަކައި ކުރެވެންހުރި ކަންތައްތައް ކުރުމުގެ ކަންތައްތައް ކޮށްދޭނަން."

މީގެ އިތުރުން، ފްލެޓު ކުލި ނުދެއްކި ބެކްލޮގް އަރާފައިވާ ފަރާތްތަކަށް ލުއި ގޮތްތަކެއް ހޯއްދަވައިދެއްވުމަށް ވެސް މަސައްކަތް ކުރައްވާކަމަށް ރައީސް ވިދާޅުވިއެވެ. އެގޮތުން އެކަން ބެލުމަށް އަންގަވާފައިވާކަމަށާއި ލިބޭ މަޢުލޫމާތަށް ބެއްލެވުމަށްފަހު އެކަމަށް ހައްލެއް ގެނެސްދެއްވުމަށް މަސައްކަތް ކުރައްވާނެކަމުގެ ޔަޤީންކަން އެމަނިކުފާނު ދެއްވިއެވެ.

ކުލީގެ މައްސަލައިގައި ރައްޔިތުން ފާހަގަކުރި ކަންކަން ސީރިއަސްގޮތެއްގައި ބައްލަވައި، ވަޢުދުވެވަޑައިގެންނެވިގޮތަށް ކުލީގެ އަދަދުތަކަށް ބަދަލު ގެންނަވާނެކަމުގެ ޔަޤީންކަން ރައީސް މުޢިއްޒު ވަނީ ދެއްވާފައެވެ. މިއީ ހިޔާ ފްލެޓުތަކުގެ ދިރިއުޅޭ ރައްޔިތުންނަށް ދިމާވެފައިވާ މާލީ ދަތިތަކަށް ލުޔެއް ހޯދައިދިނުމަށް ސަރުކާރުން ކުރައްވާ މުހިންމު މަސައްކަތެކެވެ.