އެފްއޭއެމްއަށް ދަނޑުތަކެއް އަޅައިދިން ކޮރެއާ ކުންފުންޏަކަށް 3.3 މިލިއަން ޑޮލަރު ދައްކަން ސިވިލް ކޯޓުން ހުކުމްކޮށްފިއެވެ.

ވިލިމާލެއާއި ހުޅުމާލޭގައި ފުޓުބޯޅަ ދަނޑެއް ތަރައްގީކުރުމަށް 2021ވަނަ އަހަރު އެފްއޭއެމް އާއިއެކު އެއްބަސްވުމާ އެއްގޮތަށް އެފްއޭއެމްއިން ފައިސާ ނުދައްކައިގެން އެފްއޭމްގެ މައްޗަށް ސިވިލް ކޯޓުގައި ދައުވާ އުފުލީ ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓެޑުންނެވެ.

އެ ކުންފުނިން ސިވިލްކޯޓަށް ހުށަހެޅި ދައުވާގައި ބުނެފައިވަނީ އެއްބަސްވުމުގައި ބަޔާންކޮށްފައިވާ ގޮތަށް އެފްއޭއެމުން ފައިސާ ދައްކާފައިނުވާ ކަމަށެވެ. އެ ފައިސާ ދެއްކުމުގައި ލުއިތަކެއް ދިނުމަށް އެފްއޭއެމުން އެދުމުން، ލުއި ދިން ކަމަށާއި، ނަމަވެސް ދެވުނު ލުއިތަކާ އެއްގޮތަށް ވެސް ފައިސާ ދައްކާފައިނުވާ ކަމަށް ދައުވާގައި ބުނެފަވެއެވެ.

ސިވިލް ކޯޓުގެ ޣާޒީ އަލީ އަބްދުﷲ ބެއްލެވި މި މައްސަލާގައި ޓީކުއިން ކޮންސްޓްރަކްޝަނުން ކޯޓުގައި އެދިފައިވަނީ ޖުމްލަ 5.9 މިލިއަން ޑޮލަރު އެފްއޭއެމްގެ އަތުން އެއްފަހަރާ ނަގައިދިނުމަށް އަމުރުކޮށްދިނުމަށެވެ.

ނަމަވެސް،ކޯޓުން ނިންމީ ގެއްލުމުގެ ބަދަލުގެ ގޮތުގައި އެދިފައިވާ ދެ މިލިއަން ޑޮލަރު ނަގައިދެވެން ނެތް ކަމަށެވެ. އެއީ އެއްބަސްވުމުގައި ގެއްލުމުގެ ބަދަލުދިނުމާ ގުޅޭ އެއްވަސް މާއްދާއެއް ބަޔާންކޮށްފައިނުވާތީއެވެ.

މި މައްސަލައިގައި ސިވިލް ކޯޓުން ހުކުމް ކޮށްފައި ވަނީ ޓީކުއިން ކޮންސްޓްރަކްޝަނުން އެފްއޭއެމްގެ މައްޗަށް ހުށަހަޅާފައިވާ ދައުވާ ސާބިތުވާތީ، އެ އެސޯސިއޭޝަނުން ޓީކުއިން ކޮންސްޓްރަކްޝަނަށް ދައްކަން ޖެހޭ 3.3 މިލިއަން އެމެރިކާ ޑޮލަރު އެއްމަސްދުވަހުގެ ތެރޭގައި ދައްކައި ޚަލާސްކުރުމަށެވެ.